სპორტის მართვის სტრატეგიის ფარგლებში, №1 პენიტენციურ დაწესებულებაში სამაგიდო თამაშებში – შაშში, ჭადრაკსა და მაგიდის ჩოგბურთში ტურნირი ჩატარდა.
ფესტივალის გამარჯვებულები ლეგენდარულმა ვეტერანმა ფეხბურთელმა რევაზ ჩელებაძემ დააჯილდოვა, რომელმაც სპორტის მნიშვნელობაზეც ისაუბრა და მსჯავრდებულებს პროფესიული გამოცდილება გაუზიარა.
სპეციალური პენიტენციური სამსახური ჯანსაღი ცხოვრების წესის ხელშეწყობის მიზნით სპორტული აქტივობების მხარდაჭერას გააგრძელებს.
№12 და №16 პენიტენციურ დაწესებულებებს შორის ფეხბურთში შეჯიბრი გაიმართა. ტურნირში გამარჯვება №16 დაწესებულების მსჯავრდებულთა გუნდმა მოიპოვა და პირველი ადგილის თასით დაჯილდოვდა.
სპორტისა და ფიზიკური აქტივობის ხელშეწყობა სპეციალური პენიტენციური სამსახურის ერთ-ერთი პრიორიტეტული მიმართულებაა. ამ მიზნით პენიტენციური დაწესებულებები აღიჭურვა თანამედროვე სპორტული ინვენტარით, განახლდა სპორტული ინფრასტრუქტურა და დაინერგა არაერთი სპორტული პროგრამა. ფესტივალები სპორტის სხვადასხვა სახეობაში რეგულარულად ტარდება.
სპეციალური პენიტენციური სამსახურის ორგანიზებითა და საფრანგეთის საელჩოსთან არსებული საქართველოს ფრანგული ინსტიტუტის მხარდაჭერით, №16 პენიტენციურ დაწესებულებაში მყოფი მსჯავრდებულებისთვის ფრანგულ ენაში DELF-ის (Diplôme d'Études en Langue Française) საერთაშორისო გამოცდა ჩატარდა.
საგამოცდო პროცესი საერთაშორისო სტანდარტების სრული დაცვით წარიმართა. პროცესს ფრანგული ინსტიტუტის წარმომადგენლები აკვირდებოდნენ. გამოცდის წარმატებით ჩაბარების შემთხვევაში, მსჯავრდებულები მიიღებენ ფრანგული ენის საერთაშორისოდ აღიარებულ დიპლომს, რაც მათი რეინტეგრაციისა და შემდგომი დასაქმების შესაძლებლობებს მნიშვნელოვნად გაზრდის.
ღონისძიების ფარგლებში, ასევე გაიმართა დაჯილდოების ცერემონია - დიპლომები გადაეცათ იმ მსჯავრდებულებს, რომლებმაც წინა გამოცდები წარმატებით ჩააბარეს.
№16 დაწესებულებაში ფრანგულ ენაში საერთაშორისო გამოცდა რამდენიმე წელია, წარმატებით ტარდება. აღსანიშნავია, რომ ფრანგულის სწავლების პროცესს თავად ერთ-ერთი მსჯავრდებული ხელმძღვანელობს.
დაწესებულებაში სტუმრობისას ფრანგული ინსტიტუტის წარმომადგენლებმა დაწესებულების ბიბლიოთეკას საჩუქრად გადასცეს ფრანგულენოვანი ლიტერატურა და ფრანგული ენის სახელმძღვანელოები, სტუმრებს კი, მსჯავრდებულებისგან ხელნაკეთი ნივთები გადაეცათ.
№16 პენიტენციური დაწესებულების მსჯავრდებულების მონაწილეობით კოტე მარჯანიშვილის სახელობის სახელმწიფო დრამატულ თეატრში სპექტაკლი „ლამანჩელი“ გაიმართა. წარმოდგენა იუსტიციის სამინისტროს საგრანტო კონკურსში გამარჯვებული პროექტის ფარგლებში განხორციელდა.
სპეციალური პენიტენციური სამსახურის მხარდაჭერით სპექტაკლზე მუშაობა ექვსი თვის განმავლობაში მიმდინარეობდა. სპექტაკლის რეჟისურა, მუსიკალური და მხატვრული გაფორმება თავად მსჯავრდებულებს ეკუთვნით. კომედიური ჟანრის ერთმოქმედებიან სპექტაკლში, რომელშიც 13 მსჯავრდებული და 3 პროფესიონალი მსახიობი მონაწილეობს, სიუჟეტი პენიტენციურ დაწესებულებაში ვითარდება და ასახავს მსჯავრდებულთა ძალისხმევას საკუთარი თავის ხელახლა აღმოსაჩენად. მთავარი გზავნილი კი არის ის, რომ ნებისმიერ ადამიანს, დაშვებული შეცდომების მიუხედავად, შეუძლია ცხოვრების ახლიდან დაწყება.
მსგავსი ინიციატივები მნიშვნელოვნად უწყობს ხელს ბრალდებულთა/მსჯავრდებულთა რესოციალიზაციას, გარესამყაროსთან კონტაქტის შენარჩუნებას და საზოგადოებაში წარმატებულ ინტეგრაციას.
ღონისძიებას იუსტიციის მინისტრი პაატა სალია, მინისტრის მოადგილეები, სპეციალური პენიტენციური სამსახურის ხელმძღვანელი, მოწვეული სტუმრები და მსჯავრდებულთა ოჯახის წევრები დაესწრნენ.
სპეციალური პენიტენციური სამსახური ეხმიანება ცალკეული მიკერძოებული მედიასაშუალების მიერ გავრცელებულ, მორიგ ცილისმწამებლურ ინფორმაციას მსჯავრდებულ გ.ბ. - სთან დაკავშირებით.
მაღალი საზოგადოებრივი ინტერესიდან გამომდინარე, გვსურს საზოგადოებას ვაცნობოთ, რომ მსჯავრდებული გ.ბ. პენიტენციურ დაწესებულებაში შესახლებულ იქნა 2025 წლის 27 მაისს. იგი განთავსებული იყო არა სამარტოო, არამედ 4 ადგილიან საცხოვრებელ საკანში, სხვადასხვა დროს სხვადასხვა თანამესაკნესთან ერთად, მათ შორის, მიმდინარე წლის 12 ივლისამდე.
დამატებით აღვნიშნავთ, რომ მიმდინარე წლის 11 ივლისს პენიტენციური დაწესებულების საკანში დაფიქსირდა მსჯავრდებულ გ.ბ.-სა და მასთან საკანში მყოფ პატიმარს შორის ინციდენტი, რის შედეგადაც ორივე მსჯავრდებულმა მიიღო სხვადასხვა სახის დაზიანება. მსჯავრდებულ გ.ბ.-ს პენიტენციურ დაწესებულებაში მყისიერად ჩაუტარდა პირველადი სამედიცინო დახმარება და იგი გადაყვანილ იქნა სამოქალაქო სექტორის კლინიკა „ვივამედში“, მას ზედაპირული დაზიანებები აღენიშნებოდა. ჩაუტარდა ყველა საჭირო კლინიკო-ლაბორატორიული და ინსტრუმენტული კვლევა, გაეწია სხვადასხვა ექიმ-სპეციალისტთა კონსულტაცია და სამედიცინო პერსონალის რეკომენდაციით, იმავე დღეს, დაბრუნებულ იქნა N8 პენიტენციურ დაწესებულებაში.
მიმდინარე წლის 12 ივლისს, გ.ბ. გადაყვანილ იქნა N18 ბრალდებულთა/მსჯავრდებულთა სამკურნალო დაწესებულებაში, სადაც მიეწოდება შესაბამისი სამედიცინო მომსახურება და იმყოფება სამედიცინო პერსონალის მუდმივი მეთვალყურეობის ქვეშ. სახეულის სხვადასხვა სახის დაზიანებების გამო, ამავე სამკურნალო დაწესებულებაში იმყოფება მეორე მსჯავრდებულიც.
ზემოაღნიშნულ ფაქტთან დაკავშირებით, იუსტიციის სამინისტროს შესაბამისი საგამოძიებო დანაყოფი, საქართველოს კანონმდებლობით დადგენილი წესით, ინციდენტის დაფიქსირების დღიდან, 2025 წლის 11 ივლისიდან აწარმოებს გამოძიებას და მიმდინარეობს ინტენსიური საგამოძიებო მოქმედებები. აღსანიშნავია, რომ ინციდენტთან დაკავშირებით, მსჯავრდებულ გ.ბ.-ს, ასევე, შეხვდა სახალხო დამცველის აპარატის წარმომადგენელი.
საყურადღებოა, რომ ბოლო პერიოდში ცალკეული მიკერძოებული მედიასაშუალებებისა და პირების მიერ გახშირდა პენიტენციური სამსახურის საქმიანობის დისკრედიტაციის მიზნით ცილისმწამებლური განცხადებებით საზოგადოებრივ აზრზე მანიპულირების მცდელობები, გვსურს საზოგადოებას განვუმარტოთ, რომ არც ერთი მსგავსი შემთხვევა არ დარჩება შესაბამისი რეაგირების გარეშე. სპეციალური პენიტენციური სამსახური კიდევ ერთხელ მოუწოდებს ყველა დაინტერესებულ პირსა და მედიასაშუალებას თავი შეიკავონ ყველა სახის დაუზუსტებელი და დაუსაბუთებელი ინფორმაციის გავრცელებისგან
სპეციალური პენიტენციური სამსახურის ორგანიზებით, №5 პენიტენციურ დაწესებულებაში მუსიკალური საღამო ჩატარდა, რომელშიც, ცნობილ შემსრულებლებთან ერთად, მსჯავრდებულები მონაწილეობდნენ.
სპეციალური პენიტენციური სამსახური ბრალდებულთა/მსჯავრდებულთა რესოციალიზაციის ხელშეწყობის მიზნით კულტურულ-საგანმანათლებლო აქტივობებს გააგრძელებს.
სპორტის მართვის სტრატეგიის ფარგლებში №18 პენიტენციურ დაწესებულებას გოს ფედერაციის წარმომადგენლები ესტუმრნენ. ფედერაციის წევრებმა მსჯავრდებულებს სამაგიდო თამაშის წესები გააცნეს და მათთან ერთად ითამაშეს.
გო ინტელექტუალური თამაშია, რომელიც აზროვნებისა და ლოგიკური უნარების განვითარებას უწყობს ხელს.
სპეციალური პენიტენციური სამსახური მსჯავრდებულთა რეაბილიტაცია-რესოციალიზაციის ხელშეწყობის მიზნით სპორტული და ფიზიკური აქტივობების მხარდაჭერას მომავალშიც გააგრძელებს.
სპეციალური პენიტენციური სამსახურისთვის პრიორიტეტულია მსჯავრდებულთა უმაღლეს განათლებაზე ხელმისაწვდომობის უზრუნველყოფა. პენიტენციურ სისტემაში უმაღლესი განათლების გასაგრძელებლად ყველა საჭირო პირობაა შექმნილი, მათ შორის, უზრუნველყოფილია საგანმანათლებლო მასალებზე წვდომა და საჭირო ტექნოლოგიური საშუალებები. სისტემაში წარმატებით ფუნქციონირებს „ციფრული უნივერსიტეტი“, რომელიც მსჯავრდებულ სტუდენტებს შესაძლებლობას აძლევს, დისტანციურად ჩაერთონ სასწავლო პროცესში და მიიღონ სრულფასოვანი უმაღლესი განათლება.
სპეციალური პენიტენციური სამსახური მომავალშიც გააგრძელებს მსჯავრდებულთა განათლებასა და განვითარებაზე ზრუნვას.
მხატვარმა არასრულწლოვან მსჯავრდებულებს მხატვრობის ისტორია და ხატვის სხვადასხვა ტექნიკა გააცნო და მათ პროფესიული გამოცდილება გაუზიარა. ახალგაზრდებმა თავადაც შექმნეს ნამუშევრები და პრაქტიკული რეკომენდაციებიც მიიღეს, რაც მათ შემოქმედებითი უნარების განვითარებაში დაეხმარება.
დაწესებულებაში სტუმრობისას მხატვარი სრულწლოვან ქალ მსჯავრდებულებსაც შეხვდა. შეხვედრაზე განიხილეს ხელოვნების როლი ადამიანის ემოციური და სოციალური განვითარების პროცესში. მსჯავრდებულებმა საკუთარი ნამუშევრებიც წარადგინეს და პროფესიული შეფასებები მიიღეს.
ღონისძიება რესოციალიზაცია-რეაბილიტაციის პროგრამის ნაწილია და მიზნად ისახავს მსჯავრდებულთა მოტივაციის ამაღლებას, შემოქმედებითი უნარების განვითარებასა და საზოგადოებაში წარმატებული ინტეგრაციის ხელშეწყობას.
