№17 დაწესებულებაში მყოფი მსჯავრდებულებისთვის კულტურულ-საგანმანათლებლო ღონისძიება გაიმართა. ქართველი პოეტები პატიმრებს წიგნიერების მნიშვნელობაზე ესაუბრნენ, გააცნეს საკუთარი შემოქმედება და დაწესებულების ბიბლიოთეკას საჩუქრად საავტორო წიგნები გადასცეს.
შეხვედრა კითხვა-პასუხის ფორმატში წარიმართა. სტუმრებს მსჯავრდებულებმა საკუთარი და სხვა ავტორთა ლექსებიც წაუკითხეს. პატიმრებმა დაწესებულებაში მოქმედი ბიბლიოთეკის მნიშვნელობას გაუსვეს ხაზი, სადაც როგორც ქართველი, ისე უცხოელი მწერლების შემოქმედებას ეცნობიან, იღრმავებენ ცოდნას და თავისუფალ დროს უფრო ნაყოფიერად ატარებენ.
სპეციალური პენიტენციური სამსახურისთვის პატიმართა რესოციალიზაცია-რეაბილიტაცია პრიორიტეტულია. ამ მიმართულებით პენიტენციურ დაწესებულებებში არაერთი პროგრამა და სასწავლო კურსია დანერგილი. სამსახური მსჯავრდებულთა საზოგადოებაში სრულყოფილი რეინტეგრაციის პროცესის ხელშეწყობას უწყეტ რეჟიმში გააგრძელებს.
№11 (არასრულწლოვანთა) დაწესებულებაში ტურნირი ჩატარდა სპორტის 4 სახეობაში: ფრენბურთში, ფეხბურთში, მაგიდის ჩოგბურთში, შაშში. სპორტის ფესტივალში მონაწილე ყველა მსჯავრდებულს სერტიფიკატები გადაეცა, გამარჯვებულები კი, თასებითა და მედლებით დაჯილდოვდნენ.
სპეციალური პენიტენციური სამსახური მსჯავრდებულებს შესაძლებლობას აძლევს, ჩამოყალიბდნენ პროფესიონალ ტრენერებად, ფიტნესინსტრუქტორებად, რაც მათ დაწესებულების დატოვების შემდეგ საზოგადოებაში ეფექტურ რეინტეგრაციასა და დასაქმებაში დაეხმარებათ.
პენიტენციური სამსახურისთვის სპორტისა და ფიზიკური აქტივობის ხელშეწყობა პრიორიტეტულია. ამ მიზნით პენიტენციურ დაწესებულებებში დაინერგა სპორტის მართვის სტრატეგია; განახლდა სპორტული ინვენტარი და ინფრასტრუქტურა.
ტურნირი სპეციალური პენიტენციური სამსახურის ორგანიზებით და სპორტის, ტურიზმისა და ახალგაზრდობის საერთაშორისო ფონდის ხელშეწყობით გაიმართა.
20 წლის მსჯავრდებული, რომელიც პატიმრობიდან „ამნისტიის შესახებ“ კანონის საფუძველზე გათავისუფლდა, ერთ-ერთი მათგანია, ვინც №5 (ქალთა) დაწესებულებაში ვებგვერდებისა და მობილური აპლიკაციების (UI/UX) დიზაინს პროფესიულ დონეზე ეუფლებოდა. გათავისუფლების შემდეგ ყოფილი მსჯავრდებული სწავლას „რე:სქულის“ ფიზიკურ სივრცეში აგრძელებს და კურსის დასრულებისთანავე დასაქმდება.
სპეციალური პენიტენციური სამსახური მსჯავრდებულებს სწავლის შესაძლებლობას პენიტენციური დაწესებულების დატოვების შემდეგაც აძლევს. პენიტენციური დაწესებულების დატოვების შემდეგ მაღალანაზღაურებადი პროფესიის შესწავლას „რე:სქულის“ სივრცეში კიდევ ორი ყოფილი პატიმარი გააგრძელებს.
სპეციალური პენიტენციური სამსახურის ორგანიზებით და კომპანიების – „რე:სქულის“, „რე:ინვენთის“ და „პროგრესის ამერიკული საერთაშორისო სკოლების“ დამფუძნებლის ერთობლივი მხარდაჭერით UI/UX დიზაინის კურსი ქალთა დაწესებულებაში მიმდინარე წლის თებერვლიდან ფუნქციონირებს. აღნიშნული კურსისთვის დაწესებულებაში სპეციალურად მოეწყო სივრცე, რომელიც აღიჭურვა შესაბამისი უახლესი ტექნიკით.
სპორტულ ღონისძიებაში ცენტრალური აპარატისა და სსიპ-ების 9 გუნდი მონაწილეობდა. პირველ ადგილზე საჯარო რეესტრის ეროვნული სააგენტოს გუნდი გავიდა, მეორე და მესამე ადგილი კი, სპეციალური პენიტენციური სამსახურისა და იუსტიციის სახლის გუნდებმა დაიკავეს.
იუსტიციის მინისტრის პირველმა მოადგილე თამარ ტყეშელაშვილმა მინი-ფეხბურთის ტურნირის გუნდებს გამარჯვება მიულოცა, ღონისძიების ბოლოს კი, საჯარო რეესტრის ეროვნული სააგენტოს თავმჯდომარე დავით დევიძესა და სპეციალური პენიტენციური სამსახურის თავმჯდომარე ნიკა ცხვარაშვილთან ერთად გამარჯვებული გუნდები საზეიმო ვითარებაში დააჯილდოვა.
ღონისძიებაზე სამინისტროს აპარატისა და აღსრულების ეროვნული ბიუროს გუნდებს შორის „მეგობრობის თასიც“ გათამაშდა. „მეგობრობის თასის“ მფლობელი აღსრულების ეროვნული ბიუროს გუნდი გახდა. „მეგობრობის თასი“ მინი-ფეხბურთის ტურნირზე წელს პირველად გათამაშდა და ტრადიციულ სახეს მიიღებს.
მსგავსი ტიპის სპორტული აქტივობები სამინისტროს სისტემაში მომუშავე თანამშრომლებში ჯანსაღი ცხოვრების წესის დანერგვას ემსახურება.
ჯანსაღი ცხოვრების წესის ხელშეწყობით მიზნით №17 პენიტენციურ დაწესებულებაში თანამედროვე სტანდარტების შესაბამისი ახალი სტადიონი და სავარჯიშო სივრცე მოეწყო. შესრულებულ სამუშაოს იუსტიციის მინისტრი რატი ბრეგაძე სპეციალური პენიტენციური სამსახურის ხელმძღვანელ ნიკა ცხვარაშვილთან ერთად გაეცნო.
ახალაშენებული სტადიონი ხელოვნურსაფარიანია და განკუთვნილია ფეხბურთისა და კალათბურთისთვის. განხორციელდა მიმდებარე ტერიტორიის კეთილმოწყობაც.
სპორტული მოედნის გარდა, დაწესებულების ტერიტორიაზე აშენდა სავარჯიშო სივრცე ახალი ტრენაჟორებით, სადაც მსჯავრდებულები თავისუფალი დროის უფრო ნაყოფიერად გატარებას შეძლებენ.
ჯანსაღი ცხოვრების წესის ხელშეწყობა პენიტენციურ დაწესებულებებში იუსტიციის სამინისტროს პრიორიტეტია. ამ მიზნით, 2022 წლიდან დაინერგა სპორტის მართვის სტრატეგია, რომლის ფარგლებშიც პატიმრებს შესაძლებლობა აქვთ მონაწილეობა მიიღონ სხვადასხვა სპორტულ ფესტივალებში. ასევე, მოქმედებს სხვადასხვა სპორტული პროგრამა, ტრენინგკურსები, რომლებიც მსჯავრდებულებს შესაძლებლობას აძლევს, ჩამოყალიბდნენ პროფესიონალ ტრენერებად, ფიტნესინსტრუქტორებად. ამასთან, პენიტენციურ დაწესებულებებში ინფრასტრუქტურული განახლების პროცესი უწყვეტად მიმდინარეობს.
ქალმა მსჯავრდებულებმა ტანსაცმლის მოდელები და ხელნაკეთი აქსესუარები საკუთარი დიზაინით შექმნეს და საზოგადოებასა და ჟიურის წევრებს პროფესიონალ მოდელებთან ერთად, თავადაც წარუდგინეს. სამოსისა და სამკაულების დამზადება პატიმრებმა №5 პენიტენციურ დაწესებულებაში „მოდის დიზაინის პროგრამის“ ფარგლებში შეისწავლეს, რომელიც „ბიდისი აკადემიამ“ და ორგანიზაცია „ლიდერ ქალთა საზოგადოებამ“ უსასყიდლოდ განახორციელა. ჩვენება აღნიშნული ორგანიზაციების მხარდაჭერითა და იუსტიციის სამინისტროს ხელშეწყობით გაიმართა.
ღონისძიებას იუსტიციის მინისტრის პირველი მოადგილე თამარ ტყეშელაშვილი და პენიტენციური სამსახურის ხელმძღვანელები დაესწრნენ. თამარ ტყეშელაშვილმა ხაზი გაუსვა მსჯავრდებულთათვის სასწავლო პროგრამებისა და პროფესიული კურსების განხორციელების მნიშვნელობას, რაც პატიმრებს დროის ნაყოფიერად გატარებისა და თვითრეალიზების საშუალებას აძლევს, გათავისუფლების შემდეგ კი ხელს უწყობს მათ ეფექტიან რესოციალიზაციას, დასაქმებას, შემოსავლის გაზრდას და განმეორებითი დანაშაულის პრევენციას.
პატიმარ ქალებს საკუთარი ნამუშევრების წარდგენის საშუალება პირველად მიმდინარე წლის ივნისში, ვენეციის საერთაშორისო მოდის კვირეულზე მიეცათ, სადაც მათ სხვადასხვა აქსესუარით, მათ შორის, ტყავისა და თექით გაფორმებული მოდელები წარადგინეს; დღეს კი, მსჯავრდებულებმა საზოგადოებას ახალი კოლექცია შესთავაზეს.
ჩვენებაზე მოეწყო მაღაზია „რე-მარკეტის“ პროდუქციის გამოფენა-გაყიდვა, რომელიც სხვადასხვა პენიტენციური დაწესებულების პატიმრების მიერ არის დამზადებული. მსურველებს, ასევე, შეეძლოთ ჩვენებაზე წარმოდგენილი ტანსაცმლისა და აქსესუარების შეძენაც. რეალიზაციით მიღებული თანხა მსჯავრდებულთა შემოსავალს წარმოადგენს.
განსაკუთრებულად ემოციური ღონისძიების ფინალი აღმოჩნდა. ჩვენების დასასრულს ცნობილი გახდა, რომ ერთ-ერთი მონაწილე მსჯავრდებული, „ამნისტიის შესახებ" კანონის საფუძველზე, პატიმრობიდან გათავისუფლდა.
მსჯავრდებულთა და თანამშრომელთა უფლებების მაქსიმალური რეალიზაციის მიზნით იუსტიციის მინისტრმა რატი ბრეგაძემ ქსანში №10 პენიტენციურ დაწესებულებაში ახალაშენებული ინფრასტრუქტურა გახსნა.
დაწესებულებაში მოეწყო იუსტიციის სახლი, ადვოკატებთან შეხვედრის ოთახები, აშენდა საამანათო, ხანგრძლივი და მოკლევადიანი პაემნების, საშვების და ვიდეოპაემნის სივრცეები.
დაწესებულებაში გახსნილი იუსტიციის სახლის სახელმწიფო და კერძო სექტორის სერვისებით როგორც პატიმრები, ისე თანამშრომლები შეუზღუდავად ისარგებლებენ. ეს რიგით მე-6 იუსტიციის სახლია, რომელიც პენიტენციურ სისტემაში გაიხსნა. აღნიშნული პროექტი უპრეცედენტოა და მას მსოფლიოში ანალოგი არ აქვს.
დაწესებულებაში მყოფ მსჯავრდებულებს შეეძლებათ, ისარგებლონ სრულიად ახალი და კომფორტული ინფრასტრუქტურით, რომელიც ხანგრძლივი და ხანმოკლე პაემნებისთვის მოეწყო. სივრცეები აღჭურვილია ყველა საჭირო ტექნიკით და ინვენტარით. მსჯავრდებულებს პაემნის სივრცეებით უფასოდ სარგებლობის საშუალებას 2024 წელს ამოქმედებული პენიტენციური კოდექსი აძლევს.
№10 პენიტენციურ დაწესებულებაში ახალი ინვენტარით და ტექნიკით აღიჭურვა საამანათო სივრცეც, რომელიც მინიმუმამდე ამცირებს დაწესებულებაში აკრძალული ნივთების მოხვედრის შესაძლებლობას.
საშვების სივრცეში დამონტაჟდა ახალი სკანერი, რომლითაც დაწესებულებაში შემსვლელ პირთა შემოწმება ხორციელდება. ასევე, მოეწყო ცალკე ოთახი დაწესებულებაში მისული ვიზიტორების ფიზიკური შემოწმებისთვის.
ახალი ინფრასტრუქტურის გახსნის ღონისძიებას იუსტიციის მინისტრის მოადგილე ერეკლე ღვინიანიძე, სპეციალური პენიტენციური სამსახურის ხელმძღვანელი ნიკა ცხვარაშვილი და სსიპ „იუსტიციის სახლის“ თავმჯდომარე ლაშა ლობჯანიძე ესწრებოდნენ.
საქართველოს იუსტიციის სამინისტროს სისტემაში შემავალი სახელმწიფო საქვეუწყებო დაწესებულება – სპეციალური პენიტენციური სამსახურის საკოორდინაციო საბჭო აცხადებს მიღებას შემდეგ ვაკანსიებზე (ანაზღაურების გარეშე):
ვაკანსია ცხადდება საქართველოს იუსტიციის სამინისტროს მმართველობის სფეროში მოქმედი სსიპ „დანაშაულის პრევენციის, არასაპატიმრო სასჯელთა აღსრულებისა და პრობაციის ეროვნული სააგენტოს“ პირობითი მსჯავრის გაუქმების საკითხთა განმხილველი მუდმივმოქმედი კომისიის წევრის ერთ კანდიდატურაზე – არასამთავრობო ორგანიზაციების წარმომადგენელთაგან;
ასევე, ცხადდება სპეციალური პენიტენციური სამსახურის ექვსი ადგილობრივი საბჭოს (აღმოსავლეთ საქართველოს პირველი ადგილობრივი საბჭოს, აღმოსავლეთ საქართველოს მეორე ადგილობრივი საბჭოს, აღმოსავლეთ საქართველოს მესამე ადგილობრივი საბჭოს, დასავლეთ საქართველოს ადგილობრივი საბჭოს, არასრულწლოვანთა საქმეების განმხილველი ადგილობრივი საბჭოს, ქალ მსჯავრდებულთა საქმეების განმხილველი ადგილობრივი საბჭოს) წევრის ორ-ორ კანდიდატურაზე, რომელთაგან ერთ ვაკანსიას დაიკავებს არასამთავრობო ორგანიზაციის წარმომადგენელი (6 ვაკანსია), ერთს კი – ზოგადსაგანმანათლებლო/პროფესიული/უმაღლესი საგანმანათლებლო დაწესებულების წარმომადგენელი – რაოდენობა 6.
მუდმივმოქმედი კომისიისა და ადგილობრივი საბჭოს წევრობის უფლება აქვს:
საქართველოს კანონმდებლობის შესაბამისად რეგისტრირებულ არასამთავრობო ორგანიზაციას, რომლის სადამფუძნებლო დოკუმენტაცია რეგისტრაციაში გატარების მომენტისათვის ითვალისწინებს ადამიანის უფლებათა და თავისუფლებათა დაცვას;
საქართველოს კანონმდებლობის შესაბამისად რეგისტრირებულ უმაღლესი საგანმანათლებლო/პროფესიული/ზოგადსაგანმანათლებლო დაწესებულებების წარმომადგენელს;
არასამთავრობო ორგანიზაციებს როგორც ერთმანეთში კონსულტაციებისა და შეთანხმების საფუძველზე, ისე კონკრეტულ არასამთავრობო ორგანიზაციას ინდივიდუალურად უფლება ენიჭება, კანდიდატურა წარადგინოს დამოუკიდებლად;
უმაღლესი საგანმანათლებლო/პროფესიული/ზოგადსაგანმანათლებლო დაწესებულების წარმომადგენლებმა ვაკანსიაზე განაცხადი კონკურსის გამოცხადების დასრულებამდე უნდა წარადგინონ საკოორდინაციო საბჭოში;
არასამთავრობო ორგანიზაციის წარმომადგენლის კანდიდატურის წარმოდგენასთან დაკავშირებულ წერილობით მიმართვას თან უნდა დაერთოს შემდეგი დოკუმენტაცია:
1.არასამთავრობო ორგანიზაციის მომართვა კანდიდატურის წარდგენის თაობაზე/კანდიდატის განაცხადი;
2.საჯარო რეესტრის ეროვნული სააგენტოს მიერ გაცემული ორგანიზაციის წესდება/დებულება;
3. კანდიდატის პირადობის მოწმობა;
4. კანდიდატის CV.
საგანმანათლებლო დაწესებულების წარმომადგენლის კანდიდატურის წარმოდგენის შემთხვევაში, წერილობით მიმართვას თან უნდა დაერთოს დაწესებულების რეგისტრაციისა და შესაბამისი გამოცდილების დამადასტურებელი დოკუმენტის ასლები:
1.კანდიდატის განაცხადი;
2.კანდიდატის პირადობის მოწმობის ასლი;
3.კანდიდატის CV;
4.ცნობა დასაქმების ადგილიდან;
5. საგანმანათლებლო დაწესებულების რეგისტრაციის ასლი/წესდება/დებულება.
შესაძლებელია დოკუმენტაციის წარდგენა ელექტრონული ფორმითაც მისამართზე: info@sps.gov.ge.
კანდიდატურების წარმოდგენის ვადა გაგრძელებულია 2024 წლის 04 ოქტომბრის 18.00 საათამდე.
საკონტაქტო ტელეფონი: 1500; (+995) 599 000 463
სპეციალური პენიტენციური სამსახური აგრძელებს პენიტენციურ დაწესებულებაში სპორტული აქტივობების ხელშეწყობას. ამჯერად №11 (არასრულწლოვანთა) დაწესებულებაში მყოფ მსჯავრდებულებს ჭადრაკს პროფესიულ დონეზე საქართველოს ჩემპიონი ჭადრაკში, საერთაშორისო ოსტატი სოფიო ტერელაძე ასწავლის და მეოთხე ინტერკონტინენტურ გუნდურ ჩემპიონატში მონაწილეობის მისაღებად ამზადებს.
სწავლების პროცესი მსჯავრდებულთა მაღალი ჩართულობით ერთი თვის განმავლობაში გაგრძელდება.
სპეციალური პენიტენციური სამსახურის ერთ-ერთი მთავარი პრიორიტეტი მსჯავრდებულთა/ბრალდებულთა რესოციალიზაცია-რეაბილიტაციაა. უწყების ხელშეწყსაქართველოს პენიტენციური სისტემა FIDE-ს პროექტს „ჭადრაკი თავისუფლებისთვის“ უკვე ოთხი წელია, შეუერთდა, რომლის ფარგლებში ქართველი პატიმრები ინტენსიურად მონაწილეობენ როგორც შიდა, ისე საერთაშორისო საჭადრაკო ტურნირებში. აღნიშნული პროექტის ფარგლებში, საქართველოს მსჯავრდებულ ქალთა გუნდმა მსჯავრდებულთა შორის ჭადრაკში მსოფლიო ჩემპიონის ტიტულიც მოიპოვა. წლევანდელ მსოფლიო ჩემპიონატში მონაწილეობის მისაღებად საქართველოს პენიტენციური სისტემის მსჯავრდებულთა გუნდები კვლავ აქტიურად ჩაერთვებიან.
