სპეციალური პენიტენციური სამსახური ეხმიანება ერთ-ერთი მედიასაშუალების მიერ გავრცელებულ არასწორ ინფორმაციას, თითქოს იუსტიციის მინისტრის, პაატა სალიას, ბრძანების საფუძველზე, №15 პენიტენციურ დაწესებულებაში პატიმართა განთავსების ლიმიტი „ციხეების გადატვირთულობის გადასაფარად“ გაიზარდა.
საზოგადოების ინფორმირების მიზნით განვმარტავთ, რომ №15 პენიტენციურ დაწესებულებაში საცხოვრებელი ფართობის გაანგარიშების დროს დაშვებულ იქნა უზუსტობა, რის შედეგადაც „საქართველოს სასჯელაღსრულებისა და პრობაციის სამინისტროს პენიტენციური დაწესებულებების შესახებ“ საქართველოს სასჯელაღსრულებისა და პრობაციის მინისტრის 2015 წლის 27 აგვისტოს ბრძანებაში 2016 წლის 15 აგვისტოს შეტანილი ცვლილებით, მსჯავრდებულთა განთავსების ლიმიტი განისაზღვრა არასწორად – 1388 მსჯავრდებულით, მიუხედავად იმისა, რომ, რეალურად, კანონმდებლობით დადგენილი სტანდარტების გათვალისწინებით, ამ დაწესებულებაში შესაძლებელი იყო 216-ით მეტი მსჯავრდებულის განთავსება.
№15 პენიტენციურ დაწესებულებაში მსჯავრდებულთა განთავსების ლიმიტი უცვლელად აისახა „პენიტენციური დაწესებულებებისა და პენიტენციურ დაწესებულებებში განსათავსებელ ბრალდებულთა/მსჯავრდებულთა დასაშვები მაქსიმალური რაოდენობის განსაზღვრის შესახებ“ საქართველოს იუსტიციის მინისტრის 2026 წლის 21 იანვრის №1178 ბრძანებაში, რომლის მიზანი იყო, პენიტენციური კოდექსიდან გამომდინარე, არსებული კანონქვემდებარე აქტების ხელახლა, საქართველოს იუსტიციის მინისტრის მიერ გამოცემა.
სპეციალური პენიტენციური სამსახურის მიერ, შესაბამისი გამოცდილების მქონე კერძო კომპანიასთან კანონმდებლობით დადგენილი წესით გაფორმებული საიდუმლო ხელშეკრულების საფუძველზე (ვინაიდან სამუშაოები უნდა განხორციელებულიყო პენიტენციურ დაწესებულებაში) ხელახლა აიზომა №15 პენიტენციურ დაწესებულებაში არსებული საცხოვრებელი ფართობი, რის შემდეგაც დადგინდა, რომ შესაძლებელია, კანონმდებლობით გათვალისწინებული სტანდარტების სრული დაცვით, №15 პენიტენციურ დაწესებულებაში მსჯავრდებულთა განთავსების მაქსიმალური ლიმიტი, 1388-ის ნაცვლად, განისაზღვროს 1604 მსჯავრდებულით.
აღსანიშნავია, რომ მიმდინარე წლის ივნისში, საქართველოში ევროპის საბჭოს წამების, არაადამიანური ან ღირსების შემლახველი მოპყრობისა და დასჯის პრევენციის ევროპული კომიტეტის (CPT) პრეზიდენტ ალან მიშელთან შეხვედრისას, სპეციალური პენიტენციური სამსახურის გენერალურმა დირექტორმა გიორგი პატარიძემ საკითხი დააყენა ქსნის პენიტენციურ დაწესებულებაში მსჯავრდებულთა არასწორად განთავსების ლიმიტის გასწორებასთან დაკავშირებით. აღნიშნული საკითხის მოგვარების პირობა კი დღეს უკვე შესრულებულია. შესაბამისად, მედიაში გავრცელებული ინფორმაცია წარმოადგენს საზოგადოების შეცდომაში შეყვანის მცდელობას და პენიტენციური სამსახურის საქმიანობის დისკრედიტაციას ემსახურება.
სპეციალური პენიტენციური სამსახური მოუწოდებს მედიასაშუალებებს, დაწესებულებაში არსებულ პირობებთან დაკავშირებით გააზიარონ მხოლოდ გადამოწმებული ინფორმაცია.
№11 არასრულწლოვანთა სარეაბილიტაციო დაწესებულების მსჯავრდებულებს ძიუდოში პროფესიული მწვრთნელები მოამზადებენ.
მსჯავრდებულები სასწავლო პროცესში უახლოეს პერიოდში ჩაერთვებიან. ვარჯიში კვირაში ორჯერ ჩატარდება და მას კლუბ „ოლიმპის“ ქართველი და იაპონელი მწვრთნელები გაუძღვებიან.
ახალი სპორტული პროექტის დაწყებასთან დაკავშირებით, „ოლიმპის“ წარმომადგენლებმა მსჯავრდებულებთან საინფორმაციო შეხვედრა გამართეს. შეხვედრა კითხვა-პასუხის რეჟიმში წარიმართა.
გრძელვადიანი პროექტის მიზანია არასრულწლოვან მსჯავრდებულებში ჯანსაღი ცხოვრების წესის ხელშეწყობა; ფიზიკური განვითარების, დისციპლინის, პასუხისმგებლობის უნარების გაძლიერება, რაც მათ რეაბილიტაციასა და საზოგადოებაში წარმატებულ რეინტეგრაციას შეუწყობს ხელს.
სპეციალური პენიტენციური სამსახური მომავალშიც გააგრძელებს სპორტული აქტივობების მხარდაჭერას
№11 (არასრულწლოვანთა) სარეაბილიტაციო დაწესებულების მსჯავრდებულებს ევროპის, მსოფლიო და ოლიმპიური ჩემპიონები ლაშა ტალახაძე და კახი კახიაშვილი შეხვდნენ.
სპორტსმენებმა მსჯავრდებულებს პროფესიული გამოცდილება გაუზიარეს და ჯანსაღი ცხოვრების წესის მნიშვნელობაზე ისაუბრეს. შეხვედრა კითხვა-პასუხის რეჟიმში წარიმართა.
სპეციალური პენიტენციური სამსახურისთვის სპორტისა და ფიზიკური აქტივობების ხელშეწყობა ერთ-ერთი მნიშვნელოვანი მიმართულებაა. ამ მიზნით, პენიტენციურ დაწესებულებებში სპორტის მართვის სტრატეგიის ფარგლებში, რეგულარულად იმართება სპორტული ფესტივალები და შეჯიბრებები, ახლდება სპორტული ინფრასტრუქტურა და ინვენტარი, რაც მსჯავრდებულთა რეაბილიტაცია-რესოცილიზაციის პროცესს მნიშვნელოვნად უწყობს ხელს.
სპეციალური პენიტენციური სისტემიდან 2026 წლის ერთიან ეროვნულ, საერთო სამაგისტრო და მასწავლებლის გამოცდებზე 57 ბრალდებული/მსჯავრდებულია რეგისტრირებული, მათ შორის, 5 არასრულწლოვანი.
პენიტენციური სამსახურისთვის პრიორიტეტია მსჯავრდებულთა განათლებაზე ხელმისაწვდომობის უზრუნველყოფა. ყოველწლიურად იზრდება უმაღლესი განათლების მიღების მსურველთა რაოდენობა, ფართოვდება საგანმანათლებლო რესურსებზე წვდომა და იქმნება სასწავლო პროცესისთვის აუცილებელი თანამედროვე ტექნოლოგიური პირობები. პენიტენციურ დაწესებულებებში წარმატებით ფუნქციონირებს „ციფრული უნივერსიტეტი“, რომელიც მსჯავრდებულ სტუდენტებს შესაძლებლობას აძლევს, დისტანციურად ჩაერთონ სასწავლო პროცესში და მიიღონ სრულფასოვანი უმაღლესი განათლება.
განათლების ხელშეწყობა რეაბილიტაცია-რესოციალიზაციის პროცესის ერთ-ერთი მნიშვნელოვანი მიმართულებაა. პროფესიული განვითარება და საუნივერსიტეტო განათლების მიღების შესაძლებლობა მსჯავრდებულებს საზოგადოებაში წარმატებულ რეინტეგრაციაში დაეხმარება.
სპეციალური პენიტენციური სამსახურის გენერალური დირექტორი გიორგი პატარიძე, უწყებისა და საქართველოს იუსტიციის სამინისტროს წარმომადგენლებთან ერთად, საქართველოში ვიზიტად მყოფ ევროპის საბჭოს წამების, არაადამიანური და ღირსების შემლახველი მოპყრობისა და დასჯის პრევენციის ევროპული კომიტეტის (CPT)-ის პრეზიდენტს ალან მიჩელს შეხვდა.
CPT-ის დელეგაციას დეტალური ინფორმაცია მიეწოდა სისტემაში მიმდინარე და დაგეგმილი რეფორმების, ბრალდებულთა/მსჯავრდებულთა უფლებების დაცვის, საგანმანათლებლო და პროფესიული პროგრამების შესახებ.
შეხვედრაზე ყურადღება გამახვილდა პენიტენციური სისტემის განვითარების პრიორიტეტულ მიმართულებებზე, მათ შორის მცირე ზომის, თანამედროვე სტანდარტების შესაბამისი დაწესებულებების მშენებლობასა და განვითარებაზე, რაც უფრო ეფექტიანი მართვისა და მსჯავრდებულთა რეაბილიტაციაზე ორიენტირებული გარემოს შექმნას შეუწყობს ხელს. მხარეებმა ასევე განიხილეს პენიტენციურ სისტემაში სამედიცინო მომსახურების ხელმისაწვდომობისა და ხარისხის გაუმჯობესების კუთხით განხორციელებული ღონისძიებები და სამომავლო გეგმები. აღინიშნა, რომ ბრალდებულები/ მსჯავრდებულები უზრუნველყოფილი არიან საჭირო სამედიცინო მომსახურებით, ხოლო საჭიროების შემთხვევაში მათთვის ხელმისაწვდომია სპეციალიზებულ სამოქალაქო კლინიკებში გადამისამართების შესაძლებლობა.
დელეგაციის ვიზიტი მიზნად ისახავს პენიტენციურ დაწესებულებებში არსებული მდგომარეობის შეფასებასა და მიმდინარე რეფორმების გაცნობას.
მხარეებმა კიდევ ერთხელ გაუსვეს ხაზი საერთაშორისო სტანდარტების შესაბამისად პენიტენციური სისტემის განვითარებისა და ადამიანის უფლებების დაცვის მნიშვნელობას.
ლაითურის №1 პენიტენციური დაწესებულების ინფრასტრუქტურას და დაგეგმილ ახალ პროექტებს იუსტიციის მინისტრი პაატა სალია მოადგილე ლანა მორგოშიასთან და სპეციალური პენიტენციური სამსახურის ხელმძღვანელ გიორგი პატარიძესთან ერთად გაეცნო.
უახლოეს პერიოდში დაწესებულებაში კინოთეატრი, ფრენბურთის, კალათბურთისა და ფეხბურთის სპორტული მოედნები მოეწყობა, რაც მსჯავრდებულთა რესოციალიზაცია-რეაბილიტაციის პროცესს კიდევ უფრო მეტად შეუწყობს ხელს და მათთვის დამატებით საგანმანათლებლო, კულტურულ და სპორტულ შესაძლებლობებს შექმნის.
ლაითურის პენიტენციური დაწესებულება მცირე ზომის, უმაღლესი სტანდარტების შესაბამისი პირველი დაწესებულებაა საქართველოში, რომლის თანამედროვე ინფრასტრუქტურა სხვადასხვა კატეგორიის მსჯავრდებულთა უსაფრთხო და ეფექტიან მართვას უზრუნველყოფს. დაწესებულებაში ქალი და კაცი მსჯავრდებულები ერთ სივრცეში, ერთმანეთისგან იზოლირებულად, შესაბამისი უსაფრთხოების სტანდარტების დაცვით არიან განთავსებული.
მაღალი სტანდარტის დაწესებულებაში მსჯავრდებულთა საჭიროებაზე მორგებული არაერთი სივრცე ფუნქციონირებს, მათ შორის, ციფრული უნივერსიტეტი, სადაც მათ ონლაინ ლექციებზე დასწრება და უმაღლესი განათლების მიღება შეუძლიათ; ხანმოკლე, ხანგრძლივი და ვიდეოპაემნებისთვის განკუთვნილი სივრცეები, რომლებიც ადაპტირებულია შშმ პირებისთვის; თანამშრომელთა და მსჯავრდებულთა მომსახურების ხელმისაწვდომობის მიზნით გახსნილია იუსტიციის სახლიც; სამედიცინო ნაწილი სრულად არის უზრუნველყოფილი შესაბამისი ინვენტარითა და ტექნიკით; მოწყობილია ინდივიდუალური სასეირნო და სარეაბილიტაციო სიცვრცეები ყველა ნაწილში განთავსებული მსჯავრდებულებისთვის.
საქართველოს იუსტიციის სამინისტროსა და სპეციალური პენიტენციური სამსახურის ერთ-ერთ მთავარ პრიორიტეტს დიდი ზომის დაწესებულებების ეტაპობრივად მცირე ზომის, თანამედროვე სტანდარტებზე დაფუძნებული პენიტენციური დაწესებულებებით ჩანაცვლება წარმოადგენს. სწორედ ამ მიზანს ემსახურება ლაითურის №1 პენიტენციური დაწესებულებაც, რომელიც სრულად არის მორგებული როგორც ბრალდებულთა/მსჯავრდებულთა, ისე თანამშრომელთა საჭიროებებს და უზრუნველყოფს უსაფრთხო, ღირსეულ და თანამედროვე გარემოს.
ფეხბურთელებს №15 (ქსნის) პენიტენციური დაწესებულების სპორტული ინფრასტრუქტურა სპეციალური პენიტენციური სამსახურის ხელმძღვანელმა გიორგი პატარიძემ დაათვალიერებინა.
ვეტერანი სპორტსმენები მსჯავრდებულებს შეხვდნენ, მათ პროფესიული გამოცდილება გაუზიარეს და ფიზიკური აქტივობების მნიშვნელობაზე ესაუბრნენ. გაიმართა, აგრეთვე, ამხანაგური მატჩი ფეხბურთელებისა და მსჯავრდებულების მონაწილეობით.
ღონისძიების ფარგლებში, ფეხბურთელებმა დაწესებულებას სხვადასხვა სახეობის სპორტული ინვენტარი საჩუქრად გადასცეს.
სპეციალური პენიტენციური სამსახური მომავალშიც გააგრძელებს მსჯავრდებულთათვის სპორტისა და ფიზიკური აქტივობების მხარდაჭერას.
№5 (ქალთა) პენიტენციურ დაწესებულებაში იუსტიციის მინისტრის მოადგილემ ლანა მორგოშიამ და სპეციალური პენიტენციური სამსახურის ხელმძღვანელმა გიორგი პატარიძემ საქართველოს პირველ ლედის, თამარ ბაგრატიონს, სტუმრებთან ერთად უმასპინძლეს.
პირველი ლედი გაეცნო მსჯავრდებულთა რესოციალიზაცია-რეაბილიტაციის მიმართულებით შექმნილ მრავალფეროვან სივრცეებს. მოინახულა დაწესებულების ტერიტორიაზე არსებული განახლებული სამკერვალო სივრცე, სადაც მსჯავრდებულები არიან დასაქმებულნი. სამკერვალოში დასაქმებულ მსჯავრდებულებს მიეწოდათ შესაბამისი მასალები და ქსოვილები, რომელთა გამოყენებით ქალ მსჯავრდებულებს შესაძლებლობა ექნებათ შექმნან სხვადასხვა ტიპის, მათ შორის სადღესასწაულო სამოსი. პირველი ლედის ინიციატივით, №5 პენიტენციურ დაწესებულებაში დაიგეგმა კერვის, ხელსაქმის და სხვა მასტერკლასები. აღნიშნული ქსოვილებით მსჯავრდებული ქალები ჯგუფი კახაბერი და ხანუმების სასცენო სამოსს შეკერავენ.
სტუმრობის დასასრულს, მსჯავრდებულებისა და ჯგუფი „კახაბერი და ხანუმების" კონცერტიც გაიმართა, რომელსაც იუსტიციის მინისტრის მოადგილე, საქართველოს პირველი ლედი და სხვა მოწვეული სტუმრები ესწრებოდნენ.
პენიტენციური სამსახურის ადმინისტრაციული დეპარტამენტის უფროსი და №8 პენიტენციური დაწესებულების დირექტორი საქართველოს ადვოკატთა ასოციაციის თავმჯდომარეს შეხვდნენ და არსებული თანამშრომლობის შედეგებზე, მისი შემდგომი გაღრმავებისა და გაფართოების შესაძლებლობებზე, ასევე სამომავლო ერთობლივ გეგმებზე ისაუბრეს.
შეხვედრის ფარგლებში ყურადღება გამახვილდა ბრალდებულთა და მსჯავრდებულთა უფლებების დაცვის საკითხებზე, მათ შორის ადვოკატთან დროული და სრულფასოვანი კომუნიკაციის უზრუნველყოფაზე. პენიტენციური სამსახურის წარმომადგენლებმა ირაკლი ყანდაშვილს ადგილზე დაათვალიერებინეს ადვოკატებისთვის განკუთვნილი სამუშაო სივრცე და განიხილეს ის პირობები, რომლებიც პენიტენციურ დაწესებულებაში მათ საქმიანობას უკავშირდება.
სპეციალურ პენიტენციურ სამსახურსა და საქართველოს ადვოკატთა ასოციაციას შორის თანამშრომლობა წლების განმავლობაში აქტიურად მიმდინარეობს და მნიშვნელოვან შედეგებს იძლევა. აღნიშნული პარტნიორობა დადებითად აისახება როგორც ბრალდებულთა და მსჯავრდებულთა უფლებრივი მდგომარეობის გაუმჯობესებაზე, ისე ადვოკატების პროფესიული საქმიანობის განხორციელებისთვის საჭირო პირობების შექმნაზე.
უწყებებს შორის განხორციელებული ერთობლივი ღონისძიებების შედეგად პენიტენციურ დაწესებულებებში გაუმჯობესებულია შესაბამისი ინფრასტრუქტურა და გარემო, რაც უზრუნველყოფს უფრო ორგანიზებულ, უსაფრთხო და ეფექტიან სამუშაო პირობებს როგორც ადვოკატებისთვის, ისე ბრალდებულთა და მსჯავრდებულთა უფლებების პრაქტიკაში რეალიზებისთვის.
შეხვედრაზე ასევე გამოიკვეთა თანამშრომლობის შემდგომი განვითარების პრიორიტეტული მიმართულებები, მათ შორის კომუნიკაციის მექანიზმების დახვეწა, ადვოკატებისთვის სამუშაო პირობების გაუმჯობესება და ბრალდებულთა/მსჯავრდებულთა უფლებების დაცვის დამატებითი მექანიზმების განვითარება.
მხარეებმა მზადყოფნა გამოთქვეს მომავალშიც გააგრძელონ აქტიური თანამშრომლობა, რაც ხელს შეუწყობს პენიტენციურ სისტემაში ადამიანის უფლებების დაცვის მაღალი სტანდარტების უზრუნველყოფას.
