სპეციალური პენიტენციური სამსახურის განცხადება პატიმრის მიერ თვითდაზიანების მიყენებასთან დაკავშირებით
სპეციალური პენიტენციური სამსახური აცხადებს, რომ სრული სიცრუეა, თითქოს პატიმარს პენიტენციურ სისტემაში ყურადღება არ ექცევა. თავად სიუჟეტში იყო აღნიშნული, რომ მსჯავრდებულ ლ.რ.-ს 2020 წლის მარტში ოპერაცია ჩაუტარდა. სინამდვილეში მსჯავრდებულს მისი საჭიროებიდან გამომდინარე არაერთხელ გაეწია სამედიცინო მომსახურება, როგორც პენიტენციურ სისტემაში, ასევე სამოქალაქო სექტორის კლინიკაში და მხოლოდ 2020 წელს სამოქალაქო სექტორის კლინიკაში მსჯავრდებულისთვის ჩატარებული მკურნალობის ღირებულებამ 3 372.50 ლარი შეადგინა. აღსანიშნავია ისიც, რომ სიუჟეტში ითქვა, თითქოს მსჯავრდებული სასჯელს იხდის N15 დაწესებულებაში, თუმცა სინამდვილეში იგი N10 დაწესებულების პატიმარია.
რაც შეეხება 2021 წლის 3 თებერვალს მსჯავრდებულის მიერ თვითდაზიანების მიყენებას, მსჯავრდებულმა მუცლის კედლის წინა ზედაპირზე მიიყენა 5 მილიმეტრი სიღრმის დაზიანება. მას ადგილზევე გაეწია პირველადი სამედიცინო მომსახურება პენიტენციური დაწესებულების მედპერსონალის მიერ. დაზიანების შემდგომი დამუშავების მიზნით იგი გადაიყვანეს სამოქალაქო სექტორის კლინიკაში, სადაც ჩაუტარდა ქირურგის კონსულტაცია, დამატებითი კვლევები, ჭრილობაზე დაედო ნაკერი, რის შემდეგაც ლ.რ. დაუბრუნდა სასჯელის მოხდის ადგილს. აღსანიშნავია, რომ თავად ტელეკომპანია "ტვ პირველის" პირდაპირ ჩართვაში კადრში ჩანდა მსჯავრდებული ლ.რ., რომელიც კლინიკაში მიყვანისას თავისი ფეხით გადაადგილდებოდა, რაც კიდევ ერთხელ ადასტურებს იმას, რომ იგი არ არის მძიმე მდგომარეობაში. ამდენად სიუჟეტში გაჟღერებული ინფორმაცია თავად სიუჟეტში ნაჩვენებმა კადრებმა გამორიცხა.
ინფორმაციისთვის, ლ.რ. 2016 წლიდან იხდის სასჯელს საქართველოს სსკ 178-ე მუხლით (ძარცვა), ასევე წარსულში ნასამართლევია საქართველოს სსკ 109-ე მუხლით (განზრახ მკვლელობა დამამძიმებელ გარემოებებში) და როგორც ზემოთ აღინიშნა, პენიტენციურ სისტემაში ყოფნისას მას არაერთხელ გაეწია შესაბამისი სამედიცინო მომსახურება. კერძოდ, 2019 წლის ოქტომბერში ჩაუტარდა ბუასილის ოპერაცია, განმეორებით 2020 წლის მარტში - ოპერაცია ანალური ხვრელის სტენოზის გამო. 2020 წლის ივნისში იმყოფებოდა სამოქალაქო სექტორის კლინიკაში სტაციონარულ მკურნალობაზე, სადაც მას ჩაუტარდა გამოკვლევები: ეზოფაგოგასტრო დუოდენოსკოპია, კოლონოსკოპია, მუცლის ღრუს ექოსკოპია და სხვა კლინიკო- ლაბორატორიული გამოკვლევები. მსჯავრდებულს დაუდგინდა დიაგნოზი ქრონიკული გასტრიტი, რეფლუქსეზოფაგიტი, ქრ. კოლიტი, ქრ. დუოდენიტი, ქრ. ქოლეცისტიტი. იგი რამდენჯერმე იყო გაყვანილი კლინიკაში ამბულატორიულად, მათ შორის ბოლოს 2020 წლის დეკემბერში. მიეცა რეკომენდაცია ამბულატორიულ მკურნალობაზე, რაც უტარდება დღემდე. ამასთან, მსჯავრდებულს ჩატარებული აქვს რეკომენდირებული მკურნალობის რამოდენიმე კურსი გასტროპროტექტორებით, სპაზმოლიტიკებით, პრობიოტიკებით, ფერმენტებით და ვიტამინებით.
სპეციალური პენიტენციური სამსახურის განცხადება ქუთაისის ციხის პატიმარზე ერთ-ერთი ტელევიზიის მიერ გაკეთებულ სიუჟეტთან დაკავშირებით
ამასთან, სიუჟეტში პატიმრის დამ განაცხადა, რომ დაწესებულების ადმინისტრაციამ პატიმარს სახალხო დამცველის წარმომადგენელთან შეხვედრის საშუალება არ მისცა იმ მიზნით, რომ ბრალდებულს ომბუდსმენის წარმომადგენლისთვის მასზე განხორციელებული ზეწოლის შესახებ ინფორმაცია არ მიეწოდებინა. სპეციალური პენიტენციური სამსახური აცხადებს, რომ სიუჟეტში მოყვანილი ბრალდებები არის სიცრუე, არანაირ ზეწოლას არც პატიმრების და არც მით უმეტეს დაწესებულების ადმინისტრაციის მხრიდან ადგილი არ ჰქონია. ამასთან, პენიტენციური სამსახური მოუწოდებს ომბუდსმენის აპარატს, დაინტერესდეს მოცემული საქმით და სრულ მზადყოფნას გამოთქვამს, ითანამშრომლოს ყველა შესაბამის უწყებასთან, ვინაიდან სწორედ პენიტენციური სამსახურის ინტერესში შედის, რომ სიმართლე გაირკვეს.
აღსანიშნავია, რომ ბრალდებული დ.ლ. ერთ თანამესაკნესთან ერთად იმყოფება საკანში, სადაც 24-საათიანი ელექტრონულ-ვიზუალური მეთვალყურეობა ხორციელდება და ვინაიდან N2 დაწესებულება არის დახურული ტიპის, ბრალდებულს თანამესაკნის გარდა სხვა პატიმრებთან შეხება არ აქვს. შესაბამისად, მასზე სხვა პატიმრების მხრიდან რაიმე სახის ზეწოლაზე საუბარი საფუძველს მოკლებულია. ამასთან, არც ერთ კრიმინალურ ავტორიტეტს არ აქვს იმის შესაძლებლობა, რომ რომელიმე პენიტენციურ დაწესებულებაში ვინმეზე მოახდინოს ზეწოლა, ვინაიდან პენიტენციურ სისტემას მართავს პენიტენციური სამსახურის ხელმძღვანელობა და არა კრიმინალური ავტორიტეტები.
სრული სიცრუეა ასევე ბრალდებულის დის განცხადება, თითქოს პატიმარს ომბუდსმენის წარმომადგენელთან შეხვედრის საშუალება არ მიეცა. საქართველოს სახალხო დამცველის წარმომადგენელი N2 პენიტენციურ დაწესებულებაში იმყოფებოდა დღეს, 3 თებერვალს და მოქმედი კანონმდებლობის შესაბამისად, იგი ბრალდებულს დაუბრკოლებლად შეხვდა და პირისპირ გაესაუბრა. ამასთან, როგორც ზემოთ აღინიშნა, ბრალდებული ელექტრონულ-ვიზუალური მეთვალყურეობის ქვეშ იმყოფება და იმ შემთხვევაში, თუ ომბუდსმენის აპარატი გამოთქვამს სურვილს, გაეცნოს ვიდეოსამეთვალყურეო კამერის ჩანაწერებს (საკანში და ზოგადად დაწესებულებაში ბრალდებულის გადაადგილების ამსახველ ჩანაწერებს), პენიტენციური სამსახური გამოთქვამს მზადყოფნას, როგორც ყოველთვის თანამშრომლობდა ომუბდსმენის აპარატთან, ახლაც მისცეს მას მოცემული ვიდეოჩანაწერების გაცნობის საშუალება.
სპეციალური პენიტენციური სამსახური საზოგადოებას ინტენსიური PCR ტესტირების მორიგ შედეგებს აცნობს
ამ ეტაპზე ინტენსიური ტესტირების პირველი ეტაპი დასრულებულია. ჯამში ჩატარდა 11944 ტესტი, საიდანაც დადებითი არის 194 (მათგან უკვე გამოჯანმრთელდა 26) პასუხი. ტესტირება ჩაუტარდა N18 (სამკურნალო) დაწესებულებაში მყოფ 103 პატიმარს და ყველა ტესტის პასუხი იყო უარყოფითი. ასევე ტესტირება ჩაუტარდა N17 პენიტენციური დაწესებულების 1499 მსჯავრდებულს, რომელთაგან 81-ს covid-19 დაუდასტურდა. მოცემული პირების მდგომარეობა სტაბილურია, მათი უმეტესობა ე.წ. უსიმპტომო პაციენტები არიან, ხოლო ნაწილს სუსტად გამოვლენილი სიმპტომები აქვს. ისინი დაწესებულების მედპერსონალის მეთვალყურეობის ქვეშ იმყოფებიან და იზოლირებულები არიან დაწესებულების დანარჩენი კონტიგენტისგან. თუ დადგა მსჯავრდებულის/მსჯავრდებულების ჰოსპიტალიზაციის საჭიროება, პენიტენციური სამსახური მათ ჰოსპიტალიზაციას და შესაბამისი სამედიცინო მომსახურების მიწოდებას უზრუნველყოფს.
აღსანიშნავია, რომ განმეორებითი PCR ტესტირება (ორი კვირის შუალედით) უკვე ჩატარდა ცხრა პენიტენციურ დაწესებულებაში, ხოლო N5 (ქალთა) დაწესებულებაში ტესტირება უკვე მესამედ ჩატარდა, ჯამში 2988 - ტესტი. აქედან დადებითია მხოლოდ 5 შემთხვევა. კერძოდ, 3 შემთხვევა N5 (ქალთა) დაწესებულებაში, სადაც იყო 26 დადასტურებული და შესაბამისად, 23 გამოჯანმრთელდა. ასევე 2 დადასტურებული შემთხვევაა N2 (ქუთაისის) დაწესებულებაში, სადაც იყო 5 დადასტურებული, შესაბამისად, 3 გამოჯანმრთელდა.
სპეციალური პენიტენციური სამსახურის განცხადება ომბუდსმენის მიმართვასთან დაკავშირებით
პენიტენციური დაწესებულებიდან „ამნისტიის შესახებ“ კანონის საფუძველზე პატიმრები ეტაპობრივად თავისუფლდებიან
"ამნისტიის შესახებ" კანონი პარლამენტმა 2021 წლის 11 იანვარს მიიღო. კანონის მიღების შემდეგ პენიტენციური დაწესებულებებიდან უკვე 132 პატიმარი გათავისუფლდა. მსჯავრდებულთა ამნისტიით გათავისუფლების პროცესი გრძელდება, ვინაიდან თითოეული პატიმრის გათავისუფლების საკითხს სასამართლო იხილავს და ისინი სასამართლოს გადაწყვეტილების საფუძველზე ტოვებენ საპატიმროებს.
პენიტენციურ დაწესებულებებში ხანმოკლე პაემნის უფლება პირველი თებერვლიდან აღდგება
შეგახსენებთ, covid-19-ის გავრცელების პრევენციის მიზნით პენიტენციურ სისტემაში მოქმედი განსაკუთრებული პირობების ფარგლებში შეზღუდვების პირველი ეტაპის მოხსნის შემდეგ ბრალდებულ/მსჯავრდებულებს ხანმოკლე პაემნით სარგებლობის შესაძლებლობა გასული წლის 25 მაისიდან ჰქონდათ, თუმცა ეპიდსიტუაციიდან გამომდინარე 28 ნოემბრიდან ეს უფლება კვლავ შეუჩერდათ.
ამ ეტაპზე პენიტენციური სამსახურის ხელმძღვანელობამ მიიღო გადაწყვეტილება, მოცემული შეზღუდვა 1 თებერვლიდან მოიხსნას.
იუსტიციის მინისტრმა N8 (გლდანის) და N15 (ქსნის) პენიტენციურ დაწესებულებებში ჩატარებული ინტენსიური PCR ტესტირების შედეგები გააცნო საზოგადოებას
„ამჯერად გაგაცნობთ ორი დიდი დაწესებულების - N8 (გლდანის) და N15 (ქსნის) პენიტენციური დაწესებულებების ტესტირების შედეგებს. N8 პენიტენციურ დაწესებულებაში გაკეთდა 2422 ტესტი, რომელთაგან დადებითი აღმოჩნდა 38. აქედან 8 პატიმარს გამოუვლინდა სიმპტომები და ისინი გადაყვანილი არიან სამოქალაქო სექტორის კლინიკაში, დანარჩენი 30 არის უსიმპტომო პაციენტი. ისინი დაწესებულების საკარანტინე სივრცეში იზოლაციაში არიან მოთავსებულები. ასევე იზოლაციაში მოთავსდნენ დადასტურებული შემთხვევების კონტაქტები“, - განაცხადა იუსტიციის მინისტრმა.
მისი თქმით, ინფიცირებულთა კონტაქტებს ყოველდღიურად უტარდებათ სამედიცინო პროტოკოლით გათვალისწინებული მონიტორინგი - თერმოსკრინინგი, სატურაციის კონტროლი. ამასთან, ყოველ 72 საათში ერთხელ მოხდება მათი სწრაფი ანტიგენის ტესტით შემოწმება და შემდეგ PCR ტესტით ტესტირება.
„რაც შეეხება N15 დაწესებულებას ქსანში, აქ გაკეთდა 1735 ტესტი, საიდანაც დადებითი იყო 40, ასევე არის ცალკეული შემთხვევები, რომელზეც კვლევა გრძელდება. აღსანიშნავია, რომ 40 დადასტურებული პირი არიან უსიმპტომო პაციენტები, მათი ჰოსპიტალიზაცია არ გამხდარა საჭირო. ისინი იზოლირებულები არიან დაწესებულების დანარჩენი კონტინგენტისგან და სამედიცინო პერსონალის მუდმივი მეთვალყურეობის ქვეშ იმყოფებიან. როგორც სამედიცინო პროტოკოლი ითვალისწინებს, თუ რომელიმე მათგანს გამოუვლინდა სიმპტომი, ისინი მყისიერად გადაყვანილი იქნებიან სამოქალაქო კლინიკაში. შესაბამისად, იზოლირებულები არიან მათი კონტაქტები. ამ ეტაპისთვის კიდევ ერთხელ უნდა აღინიშნოს, რომ სიტუაცია სრულად ექვემდებარება კონტროლს და შეშფოთების საფუძველი არ არსებობს. კიდევ ერთხელ გავიმეორებ, რომ ინტენსიური ტესტირებების პროცესი ამ თვის ბოლომდე დასრულდება მთლიანად ყველა პენიტენციურ დაწესებულებაში. ეს ნიშნავს, რომ ამ დროისთვის ტესტირება ჩატარებულია 10 პენიტენციურ დაწესებულებაში, სულ გაკეთდა 6654 და ჯამში გვაქვს 113 შემთხვევა“, - განაცხადა გოჩა ლორთქიფანიძემ.
სპეციალური პენიტენციური სამსახური პატიმრების ინტენსიური PCR ტესტირების შედეგების შესახებ ინფორმაციას ავრცელებს
ამჯერად ინტენსიური ტესტირება მიმდინარეობს N8 (გლდანის) პენიტენციურ დაწესებულებაში. ვინაიდან, მოცემული დაწესებულება არის დიდი ზომის, ამ ეტაპისთვის ტესტირება ჩატარდა N8 დაწესებულების ნაწილში, პროცესი ეტაპობრივად მიმდინარეობს და ორ დღეში დასრულდება. დღეის მდგომარეობით, ტესტირება გაიარა 791-მა პატიმარმა, რომელთაგან სამს დაუდასტურდა covid-19. ინფიცირებული პირებიდან ორი ერთ საკანში მყოფი პატიმარი იყო, ხოლო ერთი - სხვა საკანში იმყოფებოდა. სამივე ინფიცირებული პირი სამოქალაქო სექტორის კლინიკაშია გადაყვანილი. ისინი არიან ე.წ. უსიმპტომო პაციენტები და სამოქალაქო სექტორის კლინიკაში მედპერსონალის მეთვალყურეობის ქვეშ იმყოფებიან. ხოლო მათი თანამესაკნეები დაწესებულების საკარანტინო სივრცეში, იზოლაციაში არიან მოთავსებულები. ისინი ყოველ 72 საათში სწრაფი ანტიგენის ტესტით შემოწმდებიან, ხოლო ორ კვირაში კვლავ გაივლიან PCR ტესტირებას.
პარალელურად ინტენსიური PCR ტესტირება ორ ეტაპად ჩატარდა N15 (ქსნის) პენიტენციურ დაწესებულებაშიც და ტესტირების შედეგების სრულად მიღების შემდეგ, საზოგადოებას მიეწოდება შესაბამისი ინფორმაცია. ამასთანავე, 22 იანვარს covid-19 დაუდასტურდა N2 (ქუთაისის) პენიტენციურ დაწესებულებაში მყოფ ოთხ პატიმარს, რომელსაც კონტაქტი ჰქონდა 12 იანვარს კოვიდდადასტურებულ პირთან და რომლებიც როგორც ინფიცირებული პირის კონტაქტები 12 იანვრიდან იზოლაციაში იმყოფებიან დაწესებულების საკარანტინო სივრცეში. ისინი არიან ე.წ. უსიმპტომო პაციენტები, მათი მდგომარეობა სტაბილურია და იმყოფებიან მედპერსონალის განსაკუთრებული მეთვალყურეობის ქვეშ. კერძოდ, ინფიცირებულ პირთან კონტაქტში მყოფ პირებს, რომლებიც იზოლაციაში იმყოფებიან, ყოველდღიური თერმოსკრინინგი, სატურაციის კონტროლი და სამედიცინო პროტოკოლით გათვალისწინებული შესაბამისი მონიტორინგი უტარდებათ.
ამასთან სპეციალური პენიტენციური სამსახური განმარტავს, რომ 21 იანვარს გავრცელებული ინფორმაცია, თითქოს N2 დაწესებულებაში მყოფ ბრალდებულ ბ.ე.- ს covid-19 დაუდასტურდა, სიცრუეა. მოცემული პირი ასევე იზოლაციაშია, როგორც ინფიცირებულთან კონტაქტში მყოფი პირი, თუმცა მას ვირუსი დადასტურებული არ აქვს.
შეგახსენებთ, სპეციალურმა პენიტენციურმა სამსახურმა პატიმრების ინტენსიური PCR ტესტირება გასული წლის ბოლოს დაიწყო და უახლოეს დღეებში ეს პროცესი მთელ პენიტენციურ სისტემას მოიცავს. აღსანიშნავია, რომ მიუხედავად ვირუსის ცალკეული შემთხვევების აღმოჩენისა, სიტუაცია კონტროლს ექვემდებარება და შეშფოთების საფუძველი არ არსებობს.
სპეციალური პენიტენციური სამსახურის განცხადება ომბუდსმენის უსაფუძვლო ბრალდებებთან დაკავშირებით
სპეციალური პენიტენციური სამსახური აცხადებს, რომ სამსახურის ხელმძღვანელობა ყველანაირად ხელს უწყობს ომბუდსმენის და პრევენციის ეროვნული მექანიზმის წარმომადგენლების მიერ პენიტენციურ დაწესებულებებში არსებული სიტუაციის მონიტორინგის განხორციელებას. ამას მოწმობს თუნდაც ის ფაქტი, რომ პანდემიასთან დაკავშირებული შეზღუდვების მიუხედავად, ომბუდსმენის წარმომადგენლებს არ შექმნიათ პენიტენციურ დაწესებულებებში შესვლის და მონიტორინგის განხორციელების პრობლემა. რაც შეეხება მათზე თითქოსდა ორგანიზებულ თავდასხმებს პატიმრების მხრიდან, სპეციალური პენიტენციური სამსახური განმარტავს, რომ უწყების ხელმძღვანელობას არ აქვს არანაირი ბერკეტი, რომ ზეგავლენა მოახდინოს პატიმრების განწყობაზე ომბუდსმენის, ან ნებისმიერი სხვა ინსტიტუციისა და კერძო პირის მიმართ. თუკი რომელიმე პენიტენციურ დაწესებულებაში ომბუდსმენის მიმართ პატიმრები რაიმე საკითხთან დაკავშირებით გამოხატავენ უკმაყოფილებას, ეს არის მხოლოდ მათი განწყობა და არანაირად არ არის დაკავშირებული, ან მით უმეტეს მართული პენიტენციური დაწესებულებების ადმინისტრაციის მიერ. უფრო მეტიც, ასეთ შემთხვევებში, რა თქმა უნდა, პენიტენციური დაწესებულებების ადმინისტრაციის წარმომადგენლები მაქსიმალურად იცავენ ომბუდსმენის წარმომადგენლების უსაფრთხოებას და იმედია, ამას თავად ეს პირებიც ვერ უარყოფენ. ასევე არ აქვს პენიტენციურ სამსახურს არანაირი ბერკეტი იმისა, რომ პატიმრების მიერ ომბუდსმენის აპარატისადმი მიმართვიანობაზე მოახდინოს გავლენა, ვინაიდან პატიმრები თავისუფალი მიმოწერის და სატელეფონო კომუნიკაციის უფლებით სარგებლობენ (ცალკეული გამონაკლისების გარდა, რაც კანონმდებლობით რეგულირდება) და პენიტენციური დაწესებულებები ადრესატისთვის პატიმრების წერილების გაგზავნას უზრუნველყოფენ. შესაბამისად, თუკი ომბუდსმენთან პატიმრების მხრიდან მიმართვიანობამ იკლო, სავარაუდოა, რომ ეს ისევ და ისევ ომბუდსმენის აპარატისადმი მათი განწყობით აიხსნება და არა რაღაც არარსებული ზეგავლენით ადმინისტრაციის მხრიდან.
ამასთან, სპეციალური პენიტენციური სამსახური კიდევ ერთხელ ხაზგასმით აცხადებს, რომ არანაირი კრიმინალური სუბკულტურა პენტიენციურ დაწესებულებებში არ არსებობს. პენიტენციურ დაწესებულებებს მართავს სახელმწიფო და არა კრიმინალური ავტორიტეტები. ხოლო ის მსჯავრდებულები, რომლებიც მოისურვებენ სხვა პატიმრებზე გავლენის მოპოვებას, ნახევრადღია პენიტენციური დაწესებულებებიდან გადაჰყავთ დახურულ დაწესებულებებში, სადაც ისინი სხვა პატიმრებისგან იზოლირებულები არიან. ამას არეგულირებს საქართველოს იუსტიციის მინისტრის 2019 წლის 8 მაისის N395 ბრძანება ,,მსჯავრდებულის რისკის სახეების, რისკის შეფასების კრიტერიუმების, რისკის შეფასებისა და გადაფასების წესის, მსჯავრდებულის იმავე ან სხვა ტიპის თავისუფლების აღკვეთის დაწესებულებაში გადაყვანის წესისა და პირობების, აგრეთვე მსჯავრდებულთა საშიშროების რისკების შეფასების გუნდის საქმიანობისა და უფლებამოსილების განსაზღვრის წესის თაობაზე", რომლის შესაბამისად დაიხვეწა პატიმრებისთვის საშიშროების რისკის განსაზღვრის პროცედურა და რომლის შესაბამისად, ის მსჯავრდებულები, რომლებიც მხარდაჭერას და დადებით განწყობას გამოხატავენ კრიმინალური მენტალიტეტის მიმართ, იზოლირებულები არიან სხვა პატიმრებისგან, როგორც წესი საცხოვრებელ საკანში იმყოფებიან მარტო. ბრძანების საფუძველზე დოკუმენტის გამოცემიდან დღეის ჩათვლით ნახევრადღია პენტენციური დაწესებულებებიდან დახურულ დაწესებულებებში გადაყვანილია 60 მსჯავრდებული, ვინც სხვა პატიმრებზე გავლენის მოპოვებას შეეცადა.
შესაბამისად დღეს პენიტენციურ სისტემაში კრიმინალური ავტორიტეტების რაიმე სახის ზეგავლენაზე საუბარი არის სიცრუე და მოცემული ინფორმაციის გავრცელება ემსახურება ერთადერთ მიზანს - საზოგადოების შეცდომაში შეყვანას.
