„მოგეხსენებათ, 2020 წლის მარტიდან უკვე გატარდა კომპლექსური პრევენციული ღონისძიებები, როგორიც არის საკარანტინო ზონების მოწყობა, რეგულარული თერმოსკრინინგი, ტესტირება, მობილობის შემცირება პენიტენციურ დაწესებულებებში და ამ ძალისხმევის შედეგად ჩვენ მივიღეთ ის შედეგი, რაც გვაქვს. ჩვენ ახლა გვიყურებს პენიტენციური სისტემის ყველა თანამშრომელი, ვისაც მინდა მადლობა გადავუხადო ამ თავდადებული შრომისთვის და იმისათვის, რომ 10 თვის განმავლობაში ჩვენ შევძელით კოვიდის გარეშე სისტემის შენარჩუნება. ვიტყვი პირდაპირ, რომ ეს ვერ მოახერხეს მსოფლიოს, ევროპის წამყვანმა სახელმწიფოებმა და ამ მიღწევის შესახებ საუბარი იყო 2020 წლის ნოემბერში ევროპის საბჭოს მიერ გამოქვეყნებულ კვლევაშიც. რა თქმა უნდა, არასერიოზული იქნება იმისი მოლოდინი და მტკიცება, რომ ჩვენ უსასრულოდ შევძლებდით ისეთი ვირუსის შეჩერებას, რომელმაც მოიცვა მთლიანად მსოფლიო. რომ შევაფასოთ, აღსანიშნავი ის კი არ არის, რომ ოდესღაც ვირუსმა შეაღწია პენიტენციურ სისტემაში, არამედ აღსანიშნავია, რა რეზულტატი მოგვცა ჩვენ 10 თვით ვირუსის შეკავებამ. ამას აქვს ძალიან კონკრეტული შედეგები და გამოხატულება. კერძოდ, ჯანდაცვის სისტემა, პენიტენციური სისტემის ჯანდაცვის სეგმენტის ჩათვლით, სრულად მომზადებულია, რომ ვმართოთ ინფიცირების ყოველი შემთხვევა. ეს რომ არ ყოფილიყო, ძნელად წარმოსადგენია, რა შედეგები გვექნებოდა“, - განაცხადა იუსტიციის მინისტრმა.

მისი თქმით, დღეისათვის პენიტენციურ სისტემაში ვირუსი კონტროლს ექვემდებარება, სრულად არის მართვადი და გამომდინარე ახალი ეტაპიდან, როგორც კი პირველი სიმპტომები გაჩნდა, პენიტენციურმა სისტემამ დაიწყო ყველა პენიტენციური დაწესებულების ინტენსიური ტესტირება, ინფიცირებული პატიმრების გამოვლენა, იზოლირება და მკურნალობა. 

„ამას აქვს სისტემური ხასიათი და ახლაც გრძელდება. დღეის მდგომარეობით, PCR ტესტირება ჩატარებულია 4 დაწესებულებაში. ეს არის არასრულწლოვანთა, ქალთა, ბათუმის და გეგუთის დაწესებულებები. მინდა აღვნიშნო, რომ ქალთა პენიტენციური დაწესებულების გარდა ვირუსის ნიშნები არსად გამოვლენილა. ბოლოს, ვრცელდებოდა სხვადასხვა სახის ინფორმაცია, განსაკუთრებით, რომ გეგუთი დაიცალა, რომ გეგუთში მძვინვარებს ეპიდემია და ა.შ. გეგუთი მართლაც დაიცალა, მაგრამ ჯანღისგან დაიცალა და გამოჩნდა რეალური სურათი, რაც გვაქვს და რის შესახებაც ჩვენ პროაქტიულად ყოველთვის გატყობინებთ. კერძოდ, გეგუთში 763 ტესტიდან ყველა არის უარყოფითი. ეს მაგალითი კიდევ ერთხელ მეტყველებს იმაზე, რომ არ შეიძლება გადაუმოწმებელი და დაუზუსტებელი ინფორმაციის გავრცელება, მით უმეტეს, ისეთ მგრძნობიარე თემებზე, როგორიცაა პენიტენციური სისტემა და შეიძლება პატიმრებისა და მათი ოჯახის წევრების შეშფოთება გამოიწვიოს. არასწორი ინფორმაციის გავრცელებაში, რაც არ უნდა პოლიტიკური ოპონირების რეჟიმში ვიყოთ და პოლიტიკურ მიზნებს ვემსახურებოდეთ, საბოლოოდ ამ ქვეყანაში მთლიანად საზოგადოება იზომება ჩემი, თქვენი ურთიერთობით და ქცევით, როგორ ვეპყრობით ჩვენ პენიტენციურ სისტემას და როგორი ადამიანები ვართ ჩვენ. ახლა, ამ წუთებში, როდესაც ვსაუბრობთ, ინტენსიური ტესტირება მიმდინარეობს N2 პენიტენციურ ქუთაისის დაწესებულებაში, ბრალდებულ/მსჯავრდებულებს უტარდებათ PCR ტესტირება და არ უნდა ვიფიქროთ, რომ ინტენსიური ტესტირება განყენებულად არის რაღაც პანაცეა”, - განაცხადა გოჩა ლორთქიფანიძემ.

მისი თქმით, ინტენსიურ ტესტირებამდე მუშაობს covid-19-ის აღმოჩენის, კონტროლისა და მართვის სისტემა. სიმპტომების აღმოჩენისა და დადასტურების შემთხვევაში სამოქალაქო სექტორის კლინიკაში PCR ტესტირების შედეგად covid-19 4 პატიმარს დაუდასტურდა, 2 მათგანი არის ქსნის პენიტენციური დაწესებულების მსჯავრდებული, 1 არის რუსთავის, ხოლო 1 - N8 პენიტენციური დაწესებულების საკარანტინო სივრციდან. 

აქვე მინისტრმა განმარტა, რომ ვინაიდან მოცემული პირი N8 დაწესებულების საკარანტინო სივრციდან იყო სამოქალაქო კლინიკაში გადაყვანილი, ეს იმას ნიშნავს, რომ იგი პენიტენციურ დაწესებულებაში არ ყოფილა და დაწესებულების დანარჩენ კონტინგენტთან შეხება არ ჰქონია. 

დაბოლოს, გოჩა ლორთქიფანიძემ აღნიშნა, რომ პატიმრებისთვის ჩატარებული ყველა ტესტირების შედეგები საზოგადოებას ეტაპობრივად ეცნობება.

"ჩვენ დარწმუნებული ვართ, რომ ეს იყო ხელისუფლების მხრიდან ორგანიზებული ძალადობა და თავდასხმა." - განაცხადა ადვოკატმა.

შეგახსენებთ, მომხდარი ინციდენტის შესახებ სპეციალურმა პენიტენციურმა სამსახურმა უკვე გაავრცელა განცხადება, სადაც ნათქვამია, რომ ფაქტზე დაწყებულია გამოძიება და დეტალურად არის მოყვანილი ინციდენტის შესაბამისი ფაქტები.

ვინაიდან "ერთიანი ნაციონალური მოძრაობა" ცდილობს მომხდარის საკუთარი პოლიტიკური მიზნებისთვის გამოყენებას, ნებისმიერი სახის პოლიტიკური სპეკულაციების სამომავლოდ თავიდან ასაცილებლად, სპეციალურმა პენიტენციურმა სამსახურმა მიიღო გადაწყვეტილება, საჯარო გახადოს N8 პენიტენციურ დაწესებულებაში დღეს მომხდარი ინცინდენტის ამსახველი ვიდეომასალა. შეგახსენებთ, ფლიგელში, სადაც ინცინდენტი მოხდა, 24-საათიანი ელექტრონულ-ვიზუალური მეთვალყურეობა პატიმრობის კოდექსის შესაბამისად მიმდინარეობს.

სპეციალური პენიტენციური სამსახურის ის მოსამსახურეები, რომელთაც სამსახურებრივი მდგომარეობის გამო სამუშაო ადგილის დატოვება არ შეუძლიათ, არჩევნებში მონაწილეობას მიიღებენ პენიტენციურ დაწესებულებებში გახსნილი საარჩევნო უბნების მეშვეობით.

საქართველოს ცენტრალური საარჩევნო კომისიის 2020 წლის 9 ოქტომბრის №43/2020 დადგენილებით, 2020 წლის 31 ოქტომბრის არჩევნებისთვის განსაზღვრულია ახალი კორონავირუსის შესაძლო გავრცელებასთან დაკავშირებული პრევენციული ღონისძიებები და დადგენილია შესაბამისი სანიტარულ-ჰიგიენური წესები და შესაბამისად, საარჩევნო პროცესი პენიტენციურ დაწესებულებებში მოცემული წესების სრული დაცვით მიმდინარეობს.

„ლაითურის დაწესებულების ახალი პროექტის მთავარი პრინციპი მდგომარეობს იმაში, რომ მსჯავრდებულმა საკნის გარეთ გაატაროს დღის საათები და, ამასთან, საკნის გარეთ გატარებული დრო დატვირთული იყოს რეაბილიტაცია-რესოციალიზაციის პროექტებით. ამასთანავე, რეგიონში ამ მასშტაბის ინფრასტრუქტურული პროექტის განხორციელება ადგილობრივი მოსახლეობისთვისაც საინტერესოა იმ მხრივ, რომ ახალ პენიტენციურ დაწესებულებაში 500-მდე პირი დასაქმდება. იუსტიციის სამინისტროს სტანდარტის შესაბამისად, თანამშრომლების შერჩევა მოხდება ღია კონკურსის გზით და ამ პროცესში პრიორიტეტი სწორედ ადგილობრივ მოსახლეობას მიენიჭება”, - განაცხადა იუსტიციის მინისტრმა. მისი თქმით, ამ ეტაპზეც მოსამზადებელ სამუშაოებზე სულ 100-მდე პირი არის დასაქმებული, საიდანაც 64 არის გურიის რეგიონიდან, ხოლო ამ 64-დან 38 პირი დაბა ლაითურის მკვიდრია. სამუშაოების შემდეგ ეტაპზე, როდესაც დაწესებულების სარეკონსტრუქციო-სამშენებლო სამუშაოები დაიწყება, ობიექტზე დასაქმებულთა ოდენობაც გაიზრდება და უფრო მეტ ადგილობრივ მცხოვრებს შეეძლება დასაქმება. 

ინფორმაციისთვის, ლაითურის პროექტი არის პენიტენციური და დანაშაულის პრევენციის სისტემების განვითარების სტრატეგიისა და 2019-2020 წლების სამოქმედო გეგმის ნაწილი, რომელიც ევროკავშირის შესაბამის პროექტთან თანამშრომლობით შემუშავდა და 2019 წლის 22 თებერვალს საქართველოს იუსტიციის მინისტრის ბრძანებით დამტკიცდა. სტრატეგიის დოკუმენტის თანახმად, იგეგმება დიდი ზომის ნახევრადღია დაწესებულებების (ე.წ. „ზონების“) მცირე ზომის, შერეული რისკის პენიტენციური დაწესებულებებით ჩანაცვლება. მოცემული მიდგომა „წამებისა და არაადამიანური ან ღირსების შემლახველი მოპყრობისა თუ დასჯის საწინააღმდეგო ევროპული კომიტეტის“ (CPT) რეკომენდაციებსაც სრულად პასუხობს.

ლაითურის დაწესებულების მიტოვებული მშენებლობის განახლების მიზნით, სპეციალურმა პენიტენციურმა სამსახურმა უკვე არსებული და დაზიანებული ინფრასტრუქტურის რეკონსტრუქცია-რეაბილიტაციის პროექტზე მუშაობა 2018 წელს მას შემდეგ დაიწყო, რაც ციხეების სისტემა საქართველოს იუსტიციის სამინისტროს გადაეცა.

აღსანიშნავია, რომ დაბა ლაითურში 3600 პატიმარზე გათვლილი პენიტენციური დაწესებულების მშენებლობა ჯერ კიდევ 2007 წელს დაიწყო. თუმცა, იმ პერიოდში მხოლოდ ნაწილობრივ მოეწყო ძირითადი სარეჟიმო შენობის ფუნდამენტი და სამუშაოები შეწყდა. 2013 წელს სამუშაოები განახლდა და განხორციელდა საპროექტო დოკუმენტაციის კორექტირება. მშენებარე დაწესებულება გადაკეთდა 700 პირზე გათვლილ დახურული ტიპის დაწესებულებად. 2013-2016 წლებში მოეწყო გარე პერიმეტრის რკინა-ბეტონის ღობეები და ჩატარდა მიწის მოწყობის სამუშაოები, ნაწილობრივ აშენდა ძირითადი სარეჟიმო და ადმინისტრაციული, ასევე გარე დაცვისა და ბადრაგირების მაშინდელი სამსახურის შენობები, რის შემდეგაც სამუშაოები კვლავ შეწყდა. 2018-2019 წლებში განხორციელდა ლაითურის პენიტენციური დაწესებულების საპროექტო დოკუმენტაციის კორექტირება. საპროექტო სამუშაოები დასრულდა 2019 წლის 7 ივნისს, ხოლო 2019 წლის 10 ივნისს დასრულებული დოკუმენტაცია გაიგზავნა სსიპ ლევან სამხარაულის სასამართლო ექსპერტიზის ეროვნულ ბიუროში, საიდანაც პასუხი პენიტენციურმა სამსახურმა 2020 წლის თებერვალში მიიღო. ამის შემდეგ, 2020 წლის 2 მარტს რეკონსტრუქცია-რეაბილიტაციის სამუშაოების შესყიდვის მიზნით გამოცხადდა ტენდერი, რომელიც პირველ ჯერზე უშედეგოდ დასრულდა. 

განმეორებით გამოცხადებულ ტენდერში გამარჯვებულ კომპანიასთან კონტრაქტი 2020 წლის 22 ივნისს გაფორმდა. კომპანიამ აიღო ვალდებულება, მშენებლობა გააგრძელოს ახალი პროექტის მიხედვით და ის ხელშეკრულების გაფორმებიდან 24 თვის ვადაში დაასრულოს.