![imageVideo](/_next/image?url=%2Fapi%2Fimage-proxy%3FimageUrl%3Dhttp%253A%252F%252Fsvc-sps-website-api-main%252Fuploads%252F20240722669e3492d0aa3.jpg&w=3840&q=75)
პენიტენციური კოდექსის ამოქმედებამდე გათავისუფლებისთვის მომზადების ნაწილი ხელმისაწვდომი იყო მხოლოდ მამაკაცი მსჯავრდებულებისთვის. 2024 წლის პირველი იანვრიდან, ახალი პენიტენციური კოდექსის ამოქმედებიდან, განისაზღვრა ქალი მსჯავრდებულების ამ შესაძლებლობით სარგებლობის საკანონმდებლო საფუძველი, რაც საშუალებას მისცემს მათ, მოემზადონ გათავისუფლების შემდგომი ცხოვრებისთვის, მოიგვარონ საყოფაცხოვრებო თუ სხვა საჭიროებები, ჰქონდეთ სრულყოფილი და შეუზღუდავი კომუნიკაცია საზოგადოებასთან, რომლის განუყოფელ ნაწილსაც ისინი წარმოადგენენ და რომელსაც მცირე დროში დაუბრუნდებიან.
საქართველოს იუსტიციის სამინისტროსა და სპეციალური პენიტენციური სამსახურისთვის პრიორიტეტულია მსჯავრდებულთა რესოციალიზაცია. ადამიანს უნდა ჰქონდეს საშუალება, შეეგუოს გარე სამყაროს ისე, რომ კანონთან კონფლიქტში აღარ მოვიდეს. ხშირ შემთხვევაში მსჯავრდებულს პენიტენციურ დაწესებულებაში არაერთი წლის გატარება უწევს და, რეალურად, სულ სხვა გარემოში თავისუფლდება. გარე სამყაროსთან ადაპტაციისა და განმეორებითი დანაშაულის პრევენციის მიზნით საჭიროა სხვადასხვა სახის პროგრამა.
გათავისუფლების მომზადების ნაწილში განთავსებულნი არიან დაბალი და საშუალო საშიშროების რისკის მსჯავრდებულები, რომლებსაც სასჯელის ვადის ამოწურვამდე დარჩათ ერთი წელი. მათ საშუალება აქვთ, დასვენებისა და უქმე დღეებში დატოვონ პენიტენციური დაწესებულება, ასევე, დასაქმდნენ პენიტენციური დაწესებულების გარეთ და სამსახურიდან შესაბამისი ცნობის წარდგენის შემდეგ სამუშაო დღეებში გავიდნენ და დასვენებისა და უქმე დღეები გაატარონ დაწესებულებაში.
გათავისუფლებისთვის მომზადების ნაწილში მსჯავრდებული თავსდება მისი წერილობითი თანხმობის საფუძველზე, სადაც იგი აღნიშნავს, რომ თანახმაა, შეასრულოს დადგენილი ვალდებულებები: დაიცვას დაწესებულების დებულებითა და დღის განრიგით განსაზღვრული მოთხოვნები; ისწავლოს ან/და იმუშაოს და მონაწილეობა მიიღოს ამ დაწესებულების მიერ შეთავაზებულ სარეაბილიტაციო ღონისძიებებში; დაწესებულებაში დაბრუნდეს განსაზღვრულ დროს, რადგან დაგვიანებით გამოცხადება ან გამოუცხადებლობა იწვევს საქართველოს სისხლის სამართლის კოდექსით დადგენილ პასუხისმგებლობას, თუ ზემოაღნიშნული გამოწვეული არ არის მისგან დამოუკიდებელი მიზეზების გამო.
გათავისუფლებისთვის მომზადების ნაწილში მსჯავრდებულის გადაყვანის თაობაზე გადაწყვეტილების მიღებისას გათვალისწინება მსჯავრდებულის პიროვნული თვისებები, დანაშაულის ჩადენის მოტივი, დამდგარი მართლსაწინააღმდეგო შედეგი, სასჯელის მოხდისას გამოვლენილი ქცევა, დაწესებულებიდან გაქცევის რისკი, აგრეთვე, ის საფრთხე, რომელიც მსჯავრდებულმა შეიძლება შეუქმნას თავისუფლების აღკვეთის დაწესებულებას.
საქართველოს იუსტიციის სამინისტროსა და პენიტენციური სამსახურისთვის თითოეული მსჯავრდებულის ეფექტური რესოციალიზაცია და გარე სამყაროსთან კონტაქტის შენარჩუნება უმნიშვნელოვანესია. ამ მიზნით უწყებაში არაერთი პროგრამა ფუნქციონირების.