ვებგვერდი მუშაობს სატესტო რეჟიმში
იუსტიციის მინისტრმა დონორ და პარტნიორ ორგანიზაციებთან პენიტენციური და დანაშაულის პრევენციის სისტემების განვითარების სტრატეგიისა და 2019-2020 წლების სამოქმედო გეგმის გაცნობის მიზნით შეხვედრა გამართა
იუსტიციის მინისტრი თეა წულუკიანი დონორი და პარტნიორი ორგანიზაციების წარმომადგენლებს შეხვდა. საკოორდინაციო შეხვედრის მიზანი აღნიშნული ორგანიზაციების წარმომადგენლებისთვის პენიტენციური და დანაშაულის პრევენციის სისტემების განვითარების სტრატეგიისა და 2019-2020 წლების სამოქმედო გეგმის გაცნობა იყო. თეა წულუკიანმა შეხვედრაზე ხაზი გაუსვა დონორ და პარტნიორ ორგანიზაციებთან თანამშრომლობის მნიშვნელობას. ისაუბრა მათ მიერ განხორციელებულ პროექტებსა და იმ გეგმებზე, რომელთა ხორცშესხმა სწორედ ამ ორგანიზაციებთან თანამშრომლობის ფარგლებში იქნება შესაძლებელი, როგორც ბრალდებულთა/მსჯავრდებულთა რეაბილიტაცია-რესოციალიზაციის, ისე დანაშაულის პრევენციის მიმართულებით. მინისტრმა ისაუბრა იმ პრიორიტეტებზეც, რომელიც იუსტიციის სამინისტრომ აღნიშნული მიმართულებებით განსაზღვრა 2019-2020 წლებისთვის.
შეხვედრაზე, რომელიც დისკუსიის ფორმატში წარიმართა, დონორ და პარტნიორ ორგანიზაციებთან სამომავლო თანამშრომლობის გეგმები დაისახა.
პენიტენციური და დანაშაულის პრევენციის სისტემების განვითარების სტრაგეტია და 2019-2020 წლების სამოქმედო გეგმა ევროკავშირის პენიტენციური და პრობაციის სისტემების ხელშეწყობის პროექტის დახმარებით შემუშავდა. აღნიშნული პროექტის ფარგლებში უკვე დამტკიცებულია სისხლის სამართლის სისტემის რეფორმის განახლებული სტრატეგია, რომლის პრიორიტეტებს შორისაა ციხის პირობებისა და პატიმართა ჯანდაცვის გაუმჯობესება; პრობაციის სისტემის რეფორმა ეფექტიანი რეაბილიტაცია-რესოციალიზაციის მიზნით; რესოციალიზაციასა და დანაშაულის პრევენციაზე ორიენტირებული ინდივიდუალური მიდგომების დანერგვა და განვითარება.

FaceBook Twitter