ვებგვერდი მუშაობს სატესტო რეჟიმში
ახალი ამბები
წითელი ჯვრის საერთაშორისო კომიტეტი პატიმრებს 20-წუთიან უფასო სატელეფონო სასაუბრო დროს დაუფინანსებს

22 აპრილს სამმხრივი ხელშეკრულება გაფორმდა სპეციალურ პენიტენციურ სამსახურს, წითელი ჯვრის საერთაშორისო კომიტეტს და შპს "ო ენდ ემ ჯგუფს" (პენიტენციური სისტემისთვის სატელეფონო მომსახურების მიმწოდებელი კომპანია) შორის. ხელშეკრულების თანახმად წითელი ჯვრის საერთაშორისო კომიტეტისგან 30 000 ლარის შემოწირულობა გადაეცემა შპს "ო ენდ ემ ჯგუფს" იმისთვის, რომ პენიტენციურ სისტემაში განთავსებულ ბრალდებულ/მსჯავრდებულებს (ვისაც მოქმედი კანონმდებლობით არ აქვს დაკისრებული სატელეფონო ზარებზე შეზღუდვა) უფასო სატელეფონო სასაუბრო დრო დაუფინანსდეთ. მოცემული შემოწირულობა თითოეულ პატიმარს 20-წუთიანი უფასო სატელეფონო კომუნიკაციის (ადგილობრივ ზარებზე და მობილურ ოპერატორებთან დასაკავშირებლად) საშუალებას მისცემს. მოცემულ სასაუბრო დროს ბრალდებულ/მსჯავრდებულები მათი შეხედულებისამებრ გამოიყენებენ.


როგორც დოკუმენტის ხელმოწერისას აღინიშნა, ამ სატელეფონო სასაუბრო დროის დაფინანსებით ნაწილობრივ მაინც მოხდება გარესამყაროსთან კომუნიკაციის დეფიციტის კომპენსირება, რაც ახალი კორონავირუსის შესაძლო გავრცელების პრევენციის მიზნით, სპეციალური პენიტენციური სამსახურის გადაწყვეტილებით პაემნების აკრძალვამ შეუქმნა პატიმრებს.


"დღეს გაფორმდა სამმხრივი ხელშეკრულება, სპეციალურ პენიტენციურ სამსახურს, კომპანია"ო ენდ ემსა"და წითელი ჯვრის საერთაშორისო კომიტეტს შორის. ხელშეკრულების თანახმად, წითელი ჯვრის ფინანსური დახმარებით, უკვე დღეიდან ჩვენს პატიმრებს დაერიცხებათ 20 წუთი სატელეფონო სასაუბრო დრო, როგორც ადგილობრივ, ასევე მობილური ოპერატორის ზარებზე. კიდევ ერთხელ მინდა მადლობა გადავუხადო წითელ ჯვარს მხარდაჭერისთვის"- განაცხადა სპეციალური პენიტენციური სამსახურის გენერალურმა დირექტორმა გიორგი პატარიძემ.


„ხელშეკრულების მიზანია, წითელი ჯვრის მხრიდან სპეციალური პენიტენციური სამსახურის დახმარება, რათა COVID 19-ის  ფარგლებში დაწესებული შეზღუდვების საპასუხოდ გაიზარდოს საქართველოს ყველა პენიტენციურ დაწესებულებებში მყოფი მსჯავრდებული და ბრალდებული პირებისთვის ოჯახის წევრებთან სატელეფონო კავშირის დამყარების დრო, რომელიც დაემატება საქართველოს კანონმდებლობით გათვალისწინებული შეზღუდვების მიხედვით. ეს არის განსაკუთრებით მნიშვნელოვანი პირველი ნაბიჯი იმისთვის, რომ პაემნების შეზღუდვის პირობებში სატელეფონო ფორმით მაინც შენარჩუნდეს ოჯახებთან კავშირები. ვიმედოვნებთ, რომ პროცესი კიდევ გაგრძელდება და მეტი საშუალება ექნებათ პენიტენციურ დაწესებულებებში მყოფ პირებს, რომ სხვადასხვა ფორმით შეინარჩუნონ კავშირი ოჯახებთან,“- აღნიშნა სევერინ შაპაზმა, წითელი ჯვრის საერთაშორისო კომიტეტის საქართველოს დელეგაციის ხელმძღვანელმა.


აღსანიშნავია, რომ სპეციალურ პენიტენციურ სამსახურსა და შპს "ო ენდ ემ ჯგუფს" შორის მიღწეული შეთანხმების შედეგად, მოცემულ უფასო სასაუბრო დროს ემატება ასევე ყველა ბრალდებულ/მსჯავრდებულისთვის (ვისაც მოქმედი კანონმდებლობით არ აქვს დაკისრებული სატელეფონო ზარებზე შეზღუდვა) 15-წუთიანი უფასო სასაუბრო დრო, რომელიც პენიტენციურ სისტემაში განსაკუთრებული პირობების მოქმედების პერიოდში ყოველთვიურად საჩუქრად გადაეცემათ პატიმრებს.

22.04.2020
სააღდგომო ნობათი პენიტენციურ სისტემაში მყოფ თითოეულ პატიმარს გადაეცემა
საქართველოს პენიტენციურ დაწესებულებებში მოთავსებული თითოეულ ბრალდებულსა და მსჯავრდებულს სააღდგომოდ "გუდვილი" წითელ კვერცხებს გადასცემს.
18.04.2020
თეა წულუკიანი: პოლიტიკოსებისა და მაღალჩინოსნებისთვის აღარ იარსებებს ცალკე პენიტენციური დაწესებულება
პატიმრების ინტერესიდან და ადამიანის უფლებების პრიორიტეტიდან გამომდინარე დაიგეგმა ე.წ. მატროსოვის ციხის ლიკვიდაცია, - ეს განცხადება მთავრობის ადმინისტრაციაში გამართული საკოორდინაციო საბჭოს სხდომის შემდეგ იუსტიციის მინისტრმა გააკეთა.
06.04.2020
სპეციალური პენიტენციური სამსახურის განცხადება
საქართველოს იუსტიციის მინისტრის 2020 წლის 27 მარტის N509 ბრძანებით დაიწყო N9 (ე.წ. მატროსოვის) პენიტენციური დაწესებულების ლიკვიდაციის პროცესი.
05.04.2020
თეა წულუკიანი: "ეს პირობები შემუშავდა იმისთვის, რომ არც ჩვენ და არც პატიმრებს არ გვქონდეს იმის განცდა, რომ რომელიმე ინსპექტორ-კონტროლიორი გარედან შეიტანს ვირუსს დაწესებულებაში"
"მინდა მივმართო პატიმრებს, მოუფრთხილდნენ ამ 780 თანამშრომელს, რომლებმაც ნებით გადაწყვიტეს, თქვენთან ერთად საპატიმროში ცხოვრება მომდევნო კვირების განმავლობაში, პატივი სცენ მათ და თუ ჩვეულებრივ დროს გვქონდა ჩვენი თანამშრომლების შეურაცხყოფის ფაქტები, მომდევნო კვირებში მაინც თავი შეიკავონ ამ თანამშრომლებისადმი ნებისმიერი ტიპის აგრესიისგან, რადგან ეს ის ადამიანები არიან, რომლებიც სახელმწიფო და საზოგადოებრივი საჭიროებიდან გამომდინარე დათანხმდნენ დაწესებულების ტერიტორიაზე არაერთი დღის განმავლობაში მუდმივ რეჟიმში ცხოვრებაზე,"- განაცხადა თეა წულუკიანმა.

საქართველოს იუსტიციის მინისტრმა მიმართა ასევე პატიმრებს და მოუწოდა, მოუფრთხილდნენ პენიტენციური სისტემის თანამშრომლებს.

მან მადლობა გადაუხადა პენიტენციური სამსახურის ხელმძღვანელობას იმისთვის, რომ სისტემის თანამშრომლებისთვის საყაზარმე სივრცეების აღჭურვა და საძინებლების მოწყობა წარმოუდგენელი ტემპით, ორ დღეში მოხდა.

"780 თანამშრომელი იცხოვრებს საპატიმროების შენობებში და ამ ტერიტორიაზე, ამ ტერიტორიის დატოვების გარეშე იმისათვის, რომ არც ჩვენ და არც პატიმრებს არ გვქონდეს იმის განცდა, რომ რომელიმე ინსპექტორ-კონტროლიორი შეიტანს ვირუსს შიგნით.  ეს არის უჩვეულო, უპრეცედენტო ნაბიჯი, რაც გადადგა სპეციალურმა პენიტენციურმა სამსახურმა. პირველ რიგში მინდა ამ 780 თანამშრომელს ვუთხრა დიდი მადლობა, რადგან მათ ნებაყოფლობით მიიღეს გადაწყვეტილება, დროებით დატოვონ ოჯახები და ყოველ ორ დღეში ერთხელ 24-საათიან მორიგეობაზე გადავიდნენ. დაახლოებით 400-მდე ადამიანი იქნება თითო ცვლაში. შემდეგ ისინი დაისვენებენ საპატიმროს ტერიტორიზე მათთვის სპეციალურად შექმნილ ყაზარმულ სივრცეში. მათ ექნებათ სამჯერადი უფასო კვება და რა თქმა უნდა, ის უფლებები, რაც პატიმარს არ აქვს, რადგან ისინი, რა თქმა უნდა, არ არიან თავისუფლებააღკვეთილი პირები. მათ გაეწევათ შესაბამისი ფინანსური შეღავათი იმისთვის, რომ ნაწილობრივ მაინც ამგვარი განსაკუთრებული რეჟიმი მუშაობისა დაკომპენსირდეს"-განაცხადა თეა წულუკიანმა.

მისი თქმით, შემუშავდა მოდელი, რომელიც საპატიმროების სისტემისთვის ჩვეულებრივ დროს არ არის ბუნებრივი. შერჩეული იქნა 780 თანამშრომელი, რომელიც გუშინ გამოცხადდა სამსახურში და ისინი მომდევნო კვირების განმავლობაში აღარ წავლენ შინ.

"როგორც ვნახეთ ვირუსის გავრცელება გადავიდა ახალ ეტაპზე და ჩვენც გადავდივართ მასთან ბრძოლის ახალ ფაზაში. შესაბამისად საქართველოს საპატიმროებიც გადადის მართვის ახალ ეტაპზე" - განაცხადა თეა წულუკიანმა მთავრობის უწყებათშორისი საკოორდინაციო საბჭოს სხდომის დასრულების შემდეგ.

31.03.2020
ვიდეოჩანაწერების შექმნა და დაარქივება, რომლებიც იუსტიციის მინისტრის მიერ პარლამენტში იქნა ნაჩვენები, სახელმწიფო ინსპექტორმა კანონიერად მიიჩნია

სახელმწიფო ინსპექტორის სამსახურმა 2020 წლის 20 მარტის N გ - 1/100/2020 გადაწყვეტილებით შეაფასა სპეციალური პენიტენციური სამსახურის მიერ 2020 წლის 21 იანვარს იუსტიციის მინისტრის მიერ პარლამენტში გასაჯაროებული ვიდეოჩანაწერების შექმნის, მოპოვების, შენახვისა და გამჟღავნების კანონიერება. საქმე ეხება 2020 წლის 21 იანვარს საქართველოს პარლამენტის ადამიანის უფლებათა დაცვისა და სამოქალაქო ინტეგრაციის კომიტეტის სხდომაზე სახალხო დამცველის სპეციალური ანგარიშის საპასუხოდ გასაჯაროებულ ვიდეომასალას.

გადაწყვეტილებაში აღნიშნულია, რომ მოქმედი კანონმდებლობით, სპეციალური პენიტენციური სამსახურის შესაბამისი სტრუქტურული ქვედანაყოფი უფლებამოსილია ბრალდებულის/მსჯავრდებულის სხვა პირებთან შეხვედრას დააკვირდეს ვიზუალურად, ტექნიკური საშუალებით დისტანციური დაკვირვებისა და ჩაწერის პირობებში, მაგრამ მოსმენის გარეშე. მოცემული დასკვნით, გამოირიცხა ყოველგვარი კითხვის ნიშნები ჩანაწერის დამზადების კანონიერებასთან დაკავშირებით.

ასევე, ინსპექტორის გადაწყვეტილების თანახმად, პენიტენციური სამსახურის მიერ ვიდეოჩანაწერების დაარქივება/შენახვისას არცერთ შემთხვევაში არ ჰქონდა ადგილი კანონმდებლობით გათვალიწინებული მოთხოვნების დარღვევას.

ინსპექტორის გადაწყვეტილებაში ასევე ცალსახად არის მითითებული, რომ სპეციალურ პენიტენციურ სამსახურს, როგორც პატიმრობისა და თავისუფლების აღკვეთის აღსრულებაზე პასუხისმგებელ უწყებას, სპეციალური პენიტენციური სამსახურის რეპუტაციის, მასში დასაქმებული პირების ინტერესების დაცვისა და სახალხო დამცველის სპეციალურ ანგარიშში მითითებული გარემოებების უსაფუძვლობის დადასტურების მიზნით, გააჩნდა საზოგადოებისთვის საპასუხო არგუმენტებისა და შესაბამისი მტკიცებულებების წარდგენის უფლება.

ამით ინსპექტორის აპარატმა გაიზიარა სპეციალური პენიტენციური სამსახურის პოზიცია იმასთან დაკავშირებით, რომ ვიდეოჩანაწერების გასაჯაროებისას სამსახურის მიზანს წარმოადგენდა პენიტენციურ სისტემაში დასაქმებული თითოეული თანამშრომლის ინტერესის დაცვა, რომლებიც საკუთარი სიცოცხლისა და პირადი ღირსების შელახვის ფასად ახერხებენ მსჯავრდებულებზე ზრუნვას და დაწესებულებებში უსაფრთხოების უზრუნველყოფას. ამ პირობებში სახალხო დამცველის ანგარიში, რომელიც რეალობაზე მეტად ასახავდა არსებულ ნაკლოვანებებს არნახული მასშტაბით და უმეტეს შემთხვევაში ცდილობდა არარსებული რეალობის წარმოჩენას, საჭიროებდა სამსახურის მხრიდან შესაბამის ქმედებას. სწორედ პენიტენციურ სამსახურში და პენიტენციურ დაწესებულებებში მომუშავე პირების კანონიერი ინტერესების, სამსახურის რეპუტაციის დაცვისა და რეალური სურათის ჩვენებით მაღალი საზოგადოებრივი ინტერესის დაკმაყოფილების მიზნით (რაც გამოწვეულია პენიტენციურ სისტემაში 2012 წლამდე არსებული უმძიმესი მდგომარეობით, რადგან პატიმრებზე ძალადობა ქართული საზოგადოებისთვის არის მეტად სენსიტიური და მნიშვნელოვანი საკითხი) მიიღო სამსახურმა ზემოთხსენებული ჩანაწერების გასაჯაროების გადაწყვეტილება.

სპეციალური პენიტენციური სამსახურის მიერ ვიდეოჩანაწერების ჩაწერა/დაარქივების და გასაჯაროების კანონიერების შესწავლის მიზნით სახელმწიფო ინსპექტორის აპარატს საქართველოს ახალგაზრდა იურისტთა ასოციაციამ მიმართა. თუმცა, არასამთავრობო ორგანიზაციის არგუმენტი იმასთან დაკავშირებით, რომ სპეციალური პენიტენციური სამსახურის მიერ ჩანაწერების ჩაწერა/დაარქივებასთან არსებობდა კითხვის ნიშნები, სახელმწიფო ინსპექტორის მოცემული გადაწყვეტილებით არ იქნა გაზიარებული და ჩანაწერების როგორც შექმნა, ისე მათი შენახვა და დაარქივება კანონიერად იქნა მიჩნეული.

 

სახელმწიფო ინსპექტორის გადაწყვეტილება, რომელიც გუშინ ოფიციალურად მიეწოდა სპეციალურ პენიტენციურ სამსახურს, იხილეთ აქ:

1N100_გადაწყვეტილება_-_სპეციალური_პენიტენციური_სამსახურის_შემოწმების_დასრ..._00000002

 

27.03.2020
ახალი კორონავირუსის შესაძლო გავრცელების პრევენციის მიზნით პენიტენციურ დაწესებულებებში მოქმედი განსაკუთრებული პირობები ორი კვირის ვადით გახანგრძლივდა

 

ახალი კორონავირუსის შესაძლო გავრცელების პრევენციის მიზნით პენიტენციურ დაწესებულებებში მოქმედი განსაკუთრებული პირობები ორი კვირის ვადით, 20 მარტიდან 3 აპრილის ჩათვლით გახანგრძლივდა.
19.03.2020
ახალ კორონავირუსთან დაკავშირებული განსაკუთრებული პირობების პერიოდში პატიმრები უფასო სატელეფონო ზარებით ისარგებლებენ
იუსტიციის მინისტრის ინიციატივით, 16 მარტიდან პენიტენციურ სისტემაში განთავსებული პატიმრებისთვის სატელეფონო საუბრებზე შეღავათი ამოქმედდა. ინიციატივის შესაბამისად, თითოეულ პატიმარს მისთვის კანონით დადგენილ ფასიან დროზე 15-წუთიანი უფასო სასაუბრო დრო დაემატა, რაც პაემნების დროებით აკრძალვიდან გამომდინარე, პატიმრებისთვის გარკვეული შეღავათია.
17.03.2020
ერთი კვირაა, რაც საეჭვო სიმპტომების მქონე ახალდაკავებული პირი პენიტენციურ დაწესებულებაში ვერ ხვდება
მთავრობის უწყებათშორისი საკოორდონაციო საბჭოს რეკომენდაციების შესაბამისად, სპეციალური პენიტენციური სამსახური ახალი კორონავირუსის შესაძლო გავრცელების პრევენციის მიზნით სხვადასხვა ღონისძიებების გატარებას განაგრძობს.
16.03.2020